Gula 4
“Gikinahanglan kana sa akong career, Ma” pasabot ni Jackie. “Ang artista nga dili maantigong moatiman sa taga media dili mo-survive niining maong industriya.”
“Lakip ang bahin sa pribado nimong kinabuhi ila pang gituki,” sa inahan pa.
“Okey lang kana, Ma,” ni Jackie pa. “Naa ra man sab nako ang tanan kun motubag ba ko sa ilang pangutana o dili. Gawas pa, naanad na ko sa intriga. Mas samokan ang mga press people sa Manila kay sa Cebu.”
“Mao kanay bugti sa imong popularidad,” matud ni Mr. Rojas. “Sikat ka man tuod apan nawagtang na usab ang imong katungod nga makabaton og privacy.”
“Sagdi lang gud, papa,” mapainubsanong tubag ni Jackie kinsa nakasabot nga hangtod karon kontra-gusto pa gihapon sa iyang amahan ang iyang pag-artista. “Naanad na ko sa mga tsismis sa showbiz.”
“Ugma seguradong tapok-an ka na usab sa mga sakop sa media,” nagkanayon si Mr. Rojas.
May importanteng appointment si Jackie ugma. Usa siya sa mohatag og highlight sa inuguration ceremony sa bag-o lang natukod nga Cebu International Convention Center.
“Ayaw kabalaka, Papa,” ni Jackie pa. “Naanad na ko sa pagpakig-atubang sa press people. Ug wa na koy kurat nga manubag sa ilang mga pangutana. Gi-train ko’g maayo sa akong manager kun unsaon nako pagtubag ang mga pangutana sa taga media nga very professional kaayo og resulta.” -- Sumpayan pa