Gula 45
“Gikan pa ko sa trabaho,” nagkanayon si Edelmar. “Midiretso ko dinhi kay may mahinungdanon kong tuyo nimo.”
“U-unsa kana?” pakisayod sa dalaga.
“Niay nindot kaayong kahigayonan, An,” sa ulitawo pa. “Basin ba’g pinaagi niini makabaton na’g katumanan ang atong mga damgo.”
“Unsa man lagi kana? Sukit ni Annie nga wala makaagpas sa gisulti sa hinigugma.”
“Mo-abroad ko, An,” maoy tubag. “Moadto ko sa London.”
Wala makatingog si Annie. Wala siya magdahom nga mao kadto’y isulti ni Edelmar kaniya. Nakugang siya pag-ayo.”
Mo-abroad si Edelmar? Alang kang Annie, usa kini ka daotan nga balita. Usa kini ka balita nga dili niya angay ikalipay. Dili siya angay mahinangop sa maong balita kay nagkahulogan na man usab kini nga magkalagyo sila sa laing higayon, butang nga dili niya buot mahitabo.
Giantos niya ang upat ka tuig nga nagkalagyo sila si Edelmar gumikan kay gipaundayonan niya ang pangandoy niini nga makatapos sa pagtuon sa kolehiyo. Nakasabot siya sa tumong sa iyang hinigugma mao nga bisan lisod alang kaniya, iyang giantos ang kamingaw sulod sa upat ka tuig nga wala sila magkita. Aron lang matuman ang pangandoy niini nga makahuman og kurso.
Ug karon nga natapos na ang mao niyang pag-antos, biyaan na usab siya niini pag-usab? Pila na man kaha usab ka tuig nga dili sila magkita? Tingali mas grabe ang kamingaw nga iyang pagabation karon kay adto na man gayod si Edelmar sa layo kaayong dapit -- sa London! -- Sumpayan pa