Milabay ang daghang mga adlaw, lahi si Nympha sa ubang mga babaye nga miagi ni Jessie kay wala gayud kini malaksi sa iyang kaisipan. Wala siya makasabut sa iyang gibati.
Gibatyag ni Jessie nga gimingaw siya kang Nympha. Dili siya makasabut nganong naingon siya niini nga unta hamubo ra man kaayo ang panahon sa ilang panag-uban. Abi ni Jessie kun makalimot ra siya ni Nympha mao nga wala siya magtagad pagpangayo'g contact number sa dalaga.
Daghan pang mga adlaw, semana ug mga buwan nga milabay. Nagpabilin si Nympha sa iyang kaisipan ug naghasol kini kaniya. Naluoy siya sa dalaga kay kun magbunga ang ilang gihimo, sigurado nga kini makabaton og dakung problema.
Apan wala siya masayod kun asa pangitaa si Nympha. Nakahukom si Jessie nga moundang usa sa iyang trabaho sa barko.
Mikuha siya'g examination alang sa pagka second mate. Usa kini sa paagi ni Jessie nga makalimtan niya si Nympha kay kun magpabilin siya sa barko nga iyang gitrabahoan, dili niya makalimtan ang dalaga.
Gikaloy-an si Jessie, nakapasar siya ug karon lisensyado na siya nga second mate. Miadto siya sa opisina sa Professional Regulations Commission (PRC) kay duna siya'y kuhaon nga dukomento aron makaaplay siya sa usa ka overseas nga barko.
Daghang mga sama kang Jessie nga mokuha usab og dukomento sa PRC. Naglinya sila paingon sa usa ka opisina. Magbanus-banos ang mga kliyente nga mosulod kay aron kuhaon ang pinirmahan nga dukomento. Dapit na siya sa katapusan. Gilaayan si Jessie pagpinaabot apan wala siya'y mahimo. Hangtud nga miabot na g'yud ang iyang termino. Misulod si Jessie nga pormal kaayo ang dagway.
Pagtukas sa pultahan sa opisina, napasiga ang mga mata ni Jessie kay ang diha naglingkod sa lamesa mao si Nympha. Pareho silang duha nga nagtinutokay ug taud-taud may mibathaw nga pahiyom sa tagsa-tagsa nila ka mga ngabil.
"Nym, ikaw ba kini?" nakapangutana si Jessie. “Jess, salamat nga nagkita kita,” daw may sagol kalipay ang tonada sa sinultihan ni Nympha.
Wala makapugong si Jess ug gipatikan niya'g hawok ang ngabil sa babaye nga sa daghang mga adlaw iyang gikamingawan.
"Nym, mohangyo ko nimo, magpakasal kita. Sa mga adlaw nga kita nagkalagyo, nasuta g'yud nako nga tinuoray ang akong paghigugma kanimo," ni Jessie pa nga daw nangamoral pagbalik.
"Salamat kaayo Jess, ang tinuod mabdos ko karon sa bunga sa atong gihimo didto sa imong kabin sa barko," matud ni Nympha nga migakos sa marinero. (Kataposan)