Gula 78
Mibalos pagpabuto si Reno. Wala’y tumong ang iyang pagpusil. Ang iya lang mao ang pagsanta sa kapursigedo sa mga kaaway nga miatake kanila.
“Dagan!” Gimandoan ni Reno si Xenia.
Dihadiha midagan si Xenia. Maoy iyang gisubay ang usa ka eskinita. Nagsunod si Reno kaniya. Matag karon ug unya, mopabuto si Reno aron ang mga kaaway dili makadiretso sa paggukod kanila.
Layo na sila’g nadaganan apan nasundan gihapon sila sa mga kaaway. Ug dihang nakahigayon ang mga kaaway sa pagpusil kanila, naigo ang abaga ni Reno. Nasukarap siya ug nahagba sa yuta. Si Xenia midali pagduol sa iyang nahimutangan.
“Sibat na, Xenia,” ni Reno pa nga nagping-it sa kasakit sa samad sa abaga niini. “Ayaw pagpadakop nila.”
“P-pero ikaw?” May kahingawa ang tingog ni Xenia.
“Ako nay bahala sa akong kaugalingon.”
Ug gitunol ni Reno ang brief case nga puno sa kuwarta ngadto kang Xenia.
“Paningkamot nga dili ka madakpan,” ni Reno pa. “Aron dili mahibalik ngadto nila kanang maong salapi.”
Unya, nagsingabot na ang mga kaaway sa ilang nahimutangan. -- Sumpayan pa