“Be my lady, you’re the one that I adore, and be my lady” Kopya g’yud kaayo ni Jessie ang tingog ni Martin Nievera ug samtang siya nagpadayon pagkanta, wala siya motan-aw sa screen sa videoke, ug hinoon iyang giatubang si Nympha.
Daw gibati og gamay’ng kauwaw si Nympha kay siya maoy nahimong center of attraction sa mga tawo didto sa canteen. Igo lang siya nga mipahiyom.
Nalingaw kaayo si Nympha kay nahimo usab niya nga suod ang ubang opisyal sa barko nga kauban ni Jessie. Gidawat niya ang gitunol nga usa ka baso nga beer sa kapitan sa barko.
Gihatagan ni Jessie si Nympha og usa ka botelya nga light beer ug mao kini ang gihinay-hinay niya’g inom. Gibatyag ni Nympha ang pagpangapoy sa iyang kalawasan.
Miundang na sila pagkanta alas dies sa gabii kay patakaran sa barko nga dili na magsaba inig-abot sa maong oras. “Gusto ka ba nga adto usa kita sa bridge sa barko?” gisukna ni Jessie si Nympha. “Sige, maayo didto kay hayahay.”
Didto sa bridge sa barko. “Nauwaw kaayo ko ganina nga gikantahan ko nimo’g Be My Lady uy kay ako ray gitan-aw sa imong mga kauban,” giingnan ni Nympha si Jessie.
“Wala kadto’y kaso Nym. Mga alalay nato ang hapit tanan didto. Pila ra kabuok ang mga pasahero nga naminaw sa akong pagpanguyab nimo,” ni Jessie pa nga miagbay sa dalaga.
“Unsa? Panguyab diay tong imo Jess?” matud ni Nympha nga milingi kang Jessie. “Yes Nym, I love you.” Wala na motingog si Nympha ug mao na lay nabatyagan sa dalaga nga mianam kahugot ang gakus kaniya ni Jessie.
Daw giganahan si Nympha sa gakus ni Jessie kay nakatambal kini sa gibati niyang katugnaw. Gipasuhid ni Nympha ang iyang panan-aw sa palibot ug mingaw kaayo sa bridge.
Wala na siya modumili dihang gipatikan siya og hawok ni Jessie sa ngabil. “I love you Nym.” Gigakus pag-ayo ni Jessie ang dalaga. “I love you too Jess.”
“Tana, adto na ta sa kabin Nym kay gabii na,” giingnan ni Jessie si Nympha. Mingaw na ang mga pasahero. Sagad kanila nangatulog na sa tagsa-tagsa nila ka aseras.
Pagsulod nila sa kabin, milingkod sa ngilit sa kama si Jessie. Inanay niyang gikabig paingon kaniya si Nympha. “I love you Nym,” dayon giukoban ang mga ngabil sa dalaga. (Sumpayan)