Gula 42
Gipatawag ni Madam Minorka si Georgi. Wala madugay, nahiabot ang bayot sa buhatan sa manager. Gipaila si Xenia sa manager ngadto niini.
“Gusto siyang mo-apply pagka-singer sa club,” giingnan ni Madam Minorka si Georgi. “Ikaw nay bahala niya.”
“Yes, Madam,” nagkanayon si Georgi.
Gidala dayon si Xenia ni Georgi ngadto sa Studio C alang sa screening. Didto gipaawit siya sa lainlaing mga kanta. Gisukod gayod ni Georgi ang iyang katakos sa pag-awit. Namatikdan ni Xenia nga ingon sa mi-appreciate pag-ayo si Georgi sa iyang voice quality.
“Okey siya, Madam,” giingnan ni Georgi ang manager sa ila nang pagbalik ngadto sa buhatan niini.
Ug gidawat si Xenia sa manager isip singer sa club.
Nalipay si Xenia nga gidawat siya ni Madam Minorka isip singer sa UCV’s Sky Is The Limit entertainment club. Sa kataposan, nakakita na gyud siya’g laing trabaho.
“Puyde ka nang magsugod ugma sa gabii,” nagkanayon si Madam Minorka. “Kun duna ka pay gustong masayran mahitungod sa imong trabaho, si Georgi nay mopasabot nimo sa tanan.”
“Thank you, Madam,” matud ni Xenia. -- Sumpayan pa