Gula 37
Naghimog promisory note si Xenia ug iya kining giduso ngadto sa accounting department sa tambalanan. Ug gipa-release na ang patay’ng lawas sa iyang inahan.
Ang patay’ng lawas sa inahan ni Xenia gidala ngadto sa Cebu Southern Gateway Funeral Homes. Niini, laing suliran na usab sa kuwarta ang miabot kang Xenia. Salapi nga ibayad sa pag-embalsamar sa iyang inahan ug alang sa lungon niini.
Maayo gani kay nakasugyot si Florence kaniya og paagi. Sa pagkamatay gud sa uyoan ni Florence niadtong miaging tuig, ang kongresista sa habagatang distrito sa dakbayan sa Sugbo maoy ilang gidangpan. Ang kongresista maoy miabaga sa gasto sa pag-embalsamar ug sa lungon sa uyoan ni Florence. Mao nga misugyot si Florence nga duolon ni Xenia si Cong. Arturo B. Cuerpo.
Tuod man, mao kini ang gibuhat ni Xenia. Miadto siya sa buhatan ni Cong. Cuerpo. Gikuyogan siya ni Florence sa pagpakig-atubang sa kongresista. Ug wala mapakyas si Xenia. Gitabangan siya ni Cong. Cuerpo.
Paglabay sa duha ka adlaw, ang patay’ng lawas sa inahan ni Xenia gihatod na sa kataposan niining pahulayan.
Nag-inusara na lang si Xenia pagpuyo sa kabos nilang panimalay sa Quiot. Wala pa siya makabangon gikan sa kasubo human pagtaliwan ni Nanay Lourdes niya. Pero naningkamot siyang maka-move on. -- Sumpayan pa