Igo lang nakahuman ang doktor sa pagpakigsulti kang Xenia, nahiabot sa tambalanan si Florence, ang labing suod niyang higala sa ilang gipuy-an sa Quiot. May dala kining gamay’ng hinabang. P500! (Apan mag-unsa ang maong kantidad alang sa dakong panginahanglan alang sa ipalit og tambal sa iyang inahan?)
“May ihangyo unta ko nimo, Flor,” giingnan ni Xenia si Florence.
“U-unsa man kana, Xen?” Sukit ni Florence.
“Kun mahimo, ikaw lang usay bantay ni Nanay dinhi sa ospital. Mangita ko’g kuwarta nga ikapalit sa upat ka resita sa tambal nga gikinahanglan ni Nanay. Please lang, Flor, wa gyud koy laing masangpit sa pagkakaron. Wa man mi’y mga kabanay dinhi sa Sugbo.”
Kaha mibatig kaluoy kang Xenia, misugot si Florence sa iyang gihangyo. Maong mibiya dayon si Xenia sa ospital aron mangita’g kuwarta. Samtang naglakaw siya sa daplin sa dalan, nagpinsar siya kun kinsay iyang duolon aron pangayoan og hinabang o kaha hulaman og kuwarta.
Nakahunahuna siyang mobalik sa buhatan sa PCSO o ba kaha sa The Freeman Foundation apan nagduhaduha siya. Misantop sa iyang hunahuna nga tingalig balibaran na siya. Dili man kay siya ray tabangan sa maong mga institusyon. Gawas niya, daghan pa ang nagkinahanglan og panabang. -- Sumpayan pa