Gula 13
Usa ka adlaw niana, si Xenia ray naninda sa ilang puwesto sa gawas nga bahin sa Metropolitan Cathedral. Wala mahikuyog si Nanay Lourdes kaniya kay may gipamati kining dili maayo sa lawas. Gipapahulay una niya ang iyang inahan ug siya ray naninda og mga pagkaon sa ilang puwesto.
Dihang naudto, may miduol nga usa ka polis sa puwesto nga gitindahan ni Xenia. Nakugang siya dihang iya kining nailhan. Si Gordon! Silingan nila ang maong polis didto sa Quiot. Bohemiyo ug palikero ang maong polis. Kanunay kining magpasumbingay nga naibog kini kaniya bisan minyo na kini.
“Nag-inusara ka ra man lagi ning imong puwesto?” Gikan ni Gordon. “Hain man diay si Nang Lourdes?”
“Nahibilin sa balay,” tubag ni Xenia. “Lain kuno ang pamati niya sa iyang lawas.”
“Wala ka bay kabinlan nga maoy imong mapalihog pagbantay sa imong mga tinda?” Laing pangutana sa polis.
“Ngano man diay?” Sukit ni Xenia.
“Dapiton ko unta ikaw.”
“Sa unsa?”
“Ikuyog tikaw sa pagpanan-aw og sine. Naay nindot nga salida ron. Usa ka English movie.”
“Sorry, di ko makadawat sa imong imbitasyon. Gawas nga way makabantay sa akong mga tindang pagkaon, di sab ko hilig motan-aw og sine.” -- Sumpayan pa