Gula 7
“Gikapoy lang tingali ko, Nay. Daghan man gud mi’g gisuroyan si Kendall.”
Namakak si Xenia aron lang gyud makombinser ang iyang inahan nga wala siya’y problema.”
“May resulta na ba ang pagpangaplay ni Kendall og trabaho sa gawas sa nasod?” Gikan kang Nanay Lourdes.
“Hapit na molarga si Kendall, Nay,” maoy tubag ni Xenia. “Sa sunod buwan moadto na siya sa Manila diin adto siya manukad pagbiyahe paingon sa United Arab Emirates.”
“Maayo hinuon kun mao kana.”
“N-nagsabot mi, Nay, nga magminyo na inigpauli niya gikan sa UAE.”
“Maayo ang inyong plano. Wa koy pagsupak niana.”
Apan kalit lang usab nahisagmuyo si Xenia. Mikisdom ang iyang nawong dihang nahinumdom siya sa nahitabo nila ni Kendall kaganina.
Dili kaha mausab ang pagtan-aw ni Kendall kaniya human kini magduda nga dili maoy nakauna sa iyang pagka-babaye? Dili kaha kini mabugnaw sa ilang relasyon?
Mibati og kabalaka si Xenia.
Milabay ang duha ka semana. Si Kendall wala na gayod mopakita kang Xenia. Wala na gani kini mo-text kaniya. Kun iya kining teksan, dili sab mo-reply. Mora ba’g dili na siya importante alang kang Kendall. -- Sumpayan pa