Gula 6
“May problema ka ba, anak?” Gipangutana si Xenia sa iyang Nanay Lourdes dihang nahuman na sila’g panihapon.
“Nganong nakapangutana ka man og ingon niana, Nay?” sumbalik pangutana ni Xenia.
“Nakamatikod man gud kong ingon sa wala kay kadasig sukad pa kaganina sa imong pag-abot gikang misuroy sa downtown.”
Wala motingog si Xenia. Dili mahimong tug-anan niya si Nanay Lourdes sa matuod nga nahitabo kaniya.
“Nag-away mo si Kendall?” Daw nanaghap sa pagpangutana si Nang Lourdes.
“H-ha?” Nahakanga si Xenia.
“Di ba kamo man ang nagkuyog kaganina? Nganong nag-inusara ka na man lang nga mipauli dinhi sa ato?”
“K-kuan, Nay...wa na lang ko magpahatod niya sa pagpauli dinhi. Dili ko gustong mahasol siya pag-ayo.”
“A...mao ba?”
“Mao kana, Nay.”
“Wa lagi mo mag-away?”
“Wa, Nay, uy. Nganong mag-away man kuno mi?”
“Nagpakisayod lang ko, anak. Nagduda man gud ko nga dunay dili maayo nga nahitabo sa inyong lakaw kay mora’g dili ka madasigon nga mipauli.” -- Sumpayan pa