GULA 184
“Ibutang ta nga tinuod kanang imong katahap nga si Padre Daniel usa sa nagpaluyo sa kalihokan sa kulto,” matud ni Maj. Campo. “Pero dili tingali mahitabo nga siya ang supremo sa maong kulto. Dili ba nag-ingon ka man nga usa ka babaye ang supremo sa mga Tambayawan? Dili ba nagkasulti na kamo sa telepono dili kay usa lang ka higayon?”
Nahitiurok si Carlo. Tuod, no? Nakaingon siya sa hilom. Apan kadali ra siyang nakabunlot og banting sa gibutyag niyang mga katarongan.
“Tinuod kana,” niya pa. “Apan posible nga kadtong akong gikahinabi sa cellphone dili gayod mao ang matuod nga supremo.” “U-unsay buot mong ipasabot?” Mikunot ang agtang sa hepe.
“Mahimo nga ang supremo nagsugo lang sa usa sa iyang mga disipulo nga babaye sa pagpanawag kanako ug magpaila nga maoy supremo,” pasabot ni Carlo. “Usa kana ka taktika aron magpabiling misteryo ang matuod niyang pagkatawo.”
Nahaduko si Maj. Campo. Ingon sa maduloton kining namalandong sa giluwatang mga pulong ni Carlo. “Mora’g hapit na nako matangtang ang maskara sa supremo, Dick,” ni Carlo pa. “Magtigom pa ako’g dugang mga ebidensiya nga igong mopamatuod nga si Padre Daniel mao ang supremo sa kulto.”
“Dili maayo nga magdali-dali ka sa imong pagpamasangil, Carlo,” nagkanayon si Maj. Campo. “Hinumdomi nga usa ka pari ang imong gidudahan. Usa ka sulugoon sa Dios ug sa katawhan. Dili usa ka ordinaryong butang ang pagpasipala kaniya. Kun mosipyat ug masayop ka, hayan mahiagoman mo ang karma.”
“Nasayod ko niana, Dick,” ni Carlo pa. “Pero kun may lig-on na akong kasandigan sa akong mga katahap, anha na nako apikihon ang pari.”
“Nan,” sa hepe pa nga daw mipahunat sa detektib. “Unsay imong plano karon?” “Makigsulti ako kang Padre Daniel,” laktod nga tubag ni Carlo.
“Unsa?” ni Maj. Campo pa nga ingon sa nabalaka pagkasayod sa nakab-ot nga hukom sa detektib. “Kinahanglang akong masuta kun may kalabotan ba gayod siya sa nahitabo nila ni Arlin ug Inday Shantal,” matud ni Carlo. “Kun dili ko matagbaw sa iyang mga katarongan, mosamot gayod ang akong katahap nga siya usa ka sakop sa kulto ug maoy supremo sa mga Anti-Kristo.” -- Sumpayan pa