Nahibulong ang mga silingan sa magtiayong Ruben ug Caridad nga wala na man nila makita ang bana niini nga si Ruben. Ang ilang makita kanunay nga anha diha sa halapad nilang tanaman mao ra gyud si Caridad.
Dili man unta gihapon nga si Caridad lang ang makita matag hapon diha sa ilang hardin kay kun maglingkodlingkod si Caridad diha sa lingkoranan sulod sa hardin iya man gyung ikauban si Ruben.
Ug niadtong miaging semana nasayran ni Teroy nga hinigugma sa katabang sa magtiayon nga kanunay na lang kunong maglalis ang duruha. Matud pang Dionisia, ang katabang, nga si Ruben duna kunoy gikabuangan didto sa siyudad nga usa ka batan-on nga nagtungha sa usa ka inilang kolihiyo didto.
Guwapa kuno kaayo ang maong batan-ong kolehiyala ug gibalayan kuno kini ni Ruben. Ug diha kunoy gabii nga diriyot gyud madapati ni Ruben si Caridad kay magsige lagi’g tagawtaw bahin sa kabit sa iyang bana.
“Unsa diay, Teroy, may batan-ong kabit diay kana si Ruben?” miisa ang kilay ni Tanciang, ang tabian sab kaayong tindera’g bingka dinhi sa balangay sa Usikan.
“Oo, uy, mao nay sulti nako ni Dionisia,” ni Teroy pa nga miyupyop sa iyang sigarilyo. “Ug mao nang kada gabii madunggan gyud nato ang tingog sa magtiayon nga magbinanghagay og away.
“Sus, no, wala man unta sila maglisud kay mga dato lagi. Pero mao lagi na, kun wa kay problema sa kuwarta, hatagan gyud ka’g laing problema ug mao na karon, dunay babaye si Ruben,” mikunot ang agtang ni Tanciang tabian ug dunay sagol pahiyom kay duna man unya kini ikaylap nga tabi didto sa iyang mga komare nga otro pong mga himantayon ug tsismosa.
Unya usa ka gabii nabati na pud sa mga silingan ang panag-away pero karong gabhiona ingon sa grabe na kining awaya nila kay milanog na man gyud ang tingog ni Caridad nga tiyabaw-minatay. Taudtaod gyud ang minatay ni Caridad ug dayon nahilom.
Unya, sukad niadtong gabhiona, ila nang mamatikdan sa mga silingan nga mingaw na ang balay nila ni Ruben ug Caridad. Kanunay na lang kining serado, mga bentana ug pultahan. Pero, matag hapon makita sa dakong balay si Caridad nga maglingkod sa lingkoranan sulod sa ilang tanaman nga gialirongan sa nindot kaayong mga bulak.
Si Nitoy nga may pagka-bilyako sa mga babaye nga dunay hilom nga kaibog ngadtong Caridad kay lagi bisa’g nagpangidaron nag trayenta anyos si Caridad anaa lang gihapon ang katahom ug kabus-ok, kabigot sa lawas niini ug labaw sa tanan ang kaputi sa pamanit ug ang taliwtiw niyang ilong, miduol kang Caridad. Mipahiyom si Caridad sa kalit nga pagduol sa ulitawo.
“Kanunay ko ikaw’ng makita nga mag-inusara dinhi sa imong tanaman, Caridad,” ni Nitoy pa. “Hain man diay si Ruben.”
Mitutok si Caridad kang Nitoy ug mipahiyom. “Tua sa Amerika, ug ako na lang usa dinhi sa among balay. Si Dionisia nga among katabang akong gipapauli sa ila...”
“Uy, kun mao na, mora’g gimingaw ka na ron,” may kahulogan ang gipamulong ni Nitoy. “Hmmm....natural man gyud sa tawo, di ba, basta wala ang minahal mingawon gyud, hidlawon ba...”
Nahatutok si Caridad kang Nitoy apan wala masuko. Dihay tam-is kaayong pahiyom nga milutaw sa iyang mga ngabil ug nasabtan usab kini ni Nitoy.
Matag hapon mobisita gyud si Nitoy kang Caridad hangtod misangko kini sa usa ka tawhanong kahinam.
Didto sa lawak ni Caridad iyang gitugyan ni Nitoy ang iyang lawas. Gibati’g katagbaw si Nitoy sa gibuhat nila ni Caridad. Nasabtan ni Nitoy nga giuhaw gyud sa pagmahal si Caridad kay buot na lang kining way pupahuway diha sa kama.
Unya mitimbakuwas si Caridad sa kama ug nabantang ang hubo niyang lawas sa mga mata ni Ninoy.
“Karon, Nitoy, sama kang Ruben, imnon ko usab ang imong dugo, ngggggrrrrrrrkkk... wakkkk!wakkk! Ug gikan karong adlawa kamong mga lalaki nga maibog kanako akong balbalon, heeeeekkkk!!!”
“Ayawwwwww! Ayawww, Caridad!” Misinggit si Nitoy kinsa gibugno na ni Caridad. (Katapusan)