GULA 182
“Dinhi lang kamo, Tiyo,” ni Carlo pa. “Ayaw gayod kamo pagbiya dinhi sa balay. Tubaga kun may manawag sa telepono. Kontaka ko ninyo pinaagi sa cellphone kun gikinahanglan.”
Mitando ang tulo.
Misakay gilayon si Carlo sa iyang awto. Tulin nga nagsubay sa dalan ang iyang sakyanan sa dalan paingon sa buhatan sa kapolisan.
Naabtan ni Carlo si Maj. Dick Campo nga may gikahinabi sa telepono sulod sa buhatan niini. Wala dayon siya moduol kay misantop sa iyang hunahuna nga dili maayong tugawon ang hepe nga may gikasulti sa telepono. Mibaro’g lang una siya duol sa may pultahan.
Apan nakamatikod na diay ang hepe kaniya. Miyanghag kini kaniya ug misenyas sa paglingkod samtang padayon kining nakigsulti sa nanawag sa telepono. Milingkod si Carlo ug naminaw sa panagsulti sa hepe ug sa nanawag o gitawgan niini.
Wala dangtig usa ka gutlo sukad sa paghilingkod ni Carlo gibutang na sa hepe ang awditibo. Miatubang kini kaniya.
“Si Lt. Valera kadtong akong gikasulti,” mihagad pagtug-an si Maj. Campo. “Siya’y akong gisaligan sa pagbutang og mga checkpoints sa possible exits paingon nganhi sa lungsod.”
“Husto ang imong gibuhat, Dick,” komentaryo ni Carlo. “Nagtuo ko nga anhi gayod dad-a sa mga kidnaper sa Mabini ang inahan ug anak nga ilang gidagit.”
“Mao usab kanay akong pangagpas, Carlo,” sa hepe pa. “Mao bitaw nga gipabutangan dayon nako’g checkpoints ang tanang dapit dinhi sa lungsod nga maoy posibleng lutsan sa mga kidnaper. Mamasin lang ta nga wala pa makalusot nganhi ang mga nagdagit nila ni Arlin ug Shantal.”
Igo lang miyango si Carlo. Nanghupaw siya. Ug pagkataudtaod, mipalain siya.
“Nasayod na ako kun nganong natultolan sa mga sakop sa kulto sila si Arlin ug Inday Shantal didto sa Carmen, Dick,” niya pa.
H-ha?” Nakugang ang hepe pagkabati sa iyang gisulti. Nahitutok kini kaniya. -- Sumpayan pa