“Alang-alang, pulos ra man sab pasumbingay ang imong gihimo. Utro ka man sab nga way klaro. Kun nahitabo pang nadayon ang imong plano nga ipa-annul ang atong kasal, mag-unsa na lang kaha ko. May nahitabo na ra ba nato.”
“U-unsa?” Nakugang si Patrick.
Gisuginlan ni Urielle si Patrick sa nahitabo tali kanila niadtong pagkahubog niini. Nahikatawa si Patrick human niya suginli sa nahitabo.
“I love you, Urielle.”
“I love you, too, Patrick.”
“Tinuod gyud diay nga ang gugma moabot ra sa tukmang panahon nga gitakda alang niini.”
“Tinuod kana, Patrick. Tungod kay may gitakdang panahon ang gugma.”
“Unya, ready na ka?” Nagpahiyom si Patrick.
“Sa unsa?” Mikunot ang agtang ni Urielle.
“Atong segundahan ang nahitabo kagabii sa akong pagkahubog.”
“Buing,” gikusnit ni Urielle ang kilid ni Patrick.
Unya nangahilom sila. Mga hangos ug hagawhaw na lang ang mabati sa sulod sa lawak.
Pagka-ugma, sayong mibiya sa balay si Patrick aron mosulod sa iyang trabaho. Paghiuli niini nianang pagkahapon nagdala kini’g daghang prutas alang kang Urielle. Naikag si Urielle sa hinog nga mangga mikaon siya niini.
“Katam-is sa mangga, Patrick,” nagkanayon si Urielle nga nagnamnam sa kalami sa prutas nga gikaon.
“Hinog sa punoan, kana, Urielle,” tubag ni Patrick.”
“Tam-is gyud ang prutas nga hinog sa punoan, no?”
“Tinuod kana. Ug ingon sab niana ang atong gugma, dili ahat maong tam-is kaayong tagamtamon ang katumanan niini kay gipahinog man sa panahon.”
Wala motingog si Urielle. Igo lang niyang gitutokan si Patrick. Nagbag-iray ang ilang panan-aw. Romantiko sila’g tinan-awan sa usa’g-usa. -- Kataposan