Gula 1
Daw makabuang nga kaguol ang gibati ni Rodney sa unang adlaw niya didto sa Bagong Buhay Rehabilitation Center (BBRC), ang prisohan kaniadto sa dakbayan sa Sugbo.
Dili niya tuyo nga patyon ang iyang ama-ama apan wala na siya makaantos sa pagpanagmal niini ngadto sa iyang inahan. Batasan g’yud sa ama-ama ni Rodney nga kun mahubog mangulata sa iyang kapuyo.
Usa ka gabii, hubog na usab nga mipauli si Tatay niya Merlo ug sa walay rason gisugat dayon og santako ang inahan ni Rodney tungod lang kay wala kini makaandam og init tubig aron gamiton pagtrapo sa iyang kalawasan.
Naghilak si Rodney nga nagpakiluoy sa iyang ama-ama nga hunongon na ang pagdagmal sa iyang inahan apan giapil hinoon siya sa pagkulata. Gisakitan si Rodney sa iyang ulo nga maayong pagkalamba sa bongbong dihang gilabyog siya sa iyang ama-ama.
Miabot sa huna-huna ni Rodney nga putlon na ang kabangis sa iyang ama-ama. Midali siya pagdagan sa kusina ug mikuha’g kutsilyo. Gibalikan niya ang iyang ama-ama nga padayong midagmal sa iyang inahan. Gihansakan ni Rodney sa kutsilyo ang buko-buko ni Tatay niya Merlo. Milingi si Merlo apan giusban kini pagdunggab ni Rodney sa dughan ug tiyan.
Misukarap si Merlo sa sawog ug namatay. Kini maoy rason nga napriso si Rodney human ikiha’g kaso nga homicide.
“Hoy, ayaw diha pagsigi’g hinuktok! Limpyohi to’ng akong selda didto sa mga hugaw, pagdali!” singka sa usa ka priso nga daghang patik ang bukton nga maoy nakaputol sa paghanduraw ni Rodney.
Gihimong suloguon si Rodney sa maong priso nga mayor-mayor sa selda nga diin siya mapriso. Daghang mga adlaw sa iyang pag-antos hangtud nga miabot ang adlaw nga gipatawag siya sa warden.
“Attention Rodney Cuesta proceed to warden’s office immediately,” milanog ang tingog sa public address system nga nagmando nga si Rodney paadtuon sa warden. Gikulbaan si Rodney kay nagtuo siya nga nakasala ug mao nga gipatawag siya sa warden.
Paggawas ni Rodney sa selda nga giprisohan kaniya, giubanan dayon siya sa gwardya paingon sa opisina sa warden. “Lingkud Rodney,” kalma ang tingog sa warden nga si Major Navarez.
Wala magtingog si Rodney. Gikulbaan ang batan-on. Iyang gitagbo ang duha niya ka kamot ug gilugpitan sa duha niya ka tuhod. Gitutokan siya sa warden.
“Kumusta ang imong pagkabutang diha sa imong selda Dong Rodney?” nangutana si Major Navarez. “Maayo ra man Sir,” mubo nga tubag sa batan-ong priso. Gitug-anan siya ni Major Navarez nga nakita niya ang iyang kabuotan didto sulod sa selda pinaagi sa sekreto niya nga monitoring camera nga gibutang nga walay kalibotan ang mga priso. (Sumpayan)