Gula 71
“D-dili lang tingali ko, Patrick,” maukon-ukonong balibad ni Urielle. “Tingali’g ma-out of place lang unya ko. Mauwaw ko.”
“Ngano bang ma-out of place ka man nga naa man ko?” Kuyog lang gud. Lain kaayong hunahunaon nga ako nga maoy general manager sa kompaniya dili kuyogan sa akong asawa atol sa maong okasyon.”
Sa kaikog ni Urielle kang Patrick, misanong na lang siya sa gustong mahitabo sa iyang bana.
Nianang pagkaugma, nahiabot ang mga ginikanan ni Urielle gikan sa Tuburan. Labihan niyang lipaya. Nahinangop siya pag-ayo. Gimingaw na siya sa iyang mga ginikanan. Sukad nga gikasal sila si Patrick, karon lang nahiduaw ang iyang mga ginikanan sa ilang gipuy-an sa Busay.
Naatol nga nakagikan na si Patrick paingon sa trabaho sa paghiabot sa iyang mga ginikanan. Mo-text unta siya ngadto niini aron pagpahibalo nga nahiabot sila si Noy Sidro ug Nang Marciana. Apan mipugong si Noy Sidro. Total, dili man sila mamauli dayon. Inigkaugma pa sila mamalik ngadto sa Tuburan busa ikahimamat pa nila si Patrick.
Daghan og gibalita ang iyang mga ginikanan kaniya mahitungod sa mga panghitabo didto sa Tuburan sukad sa iyang pagkaminyo. Ang usa sa gibalita sa iyang mga ginikanan kaniya mao nga nagminyo na si Nelson. Gikasal kini sa miagi lang nga bulan. -- Sumpayan pa