Nagsubo si Almira karong buntaga. Naglain iyang lawas. Di siya ganahang manglihoklihok. Naghunahuna na siya sa dakong trabahoon sa iyang panimalay kun wa na siyay katabang. Nananghid man god si Marivel nga mopauli na. Unom pa lang siya ka bulan nga nagtrabaho.
Kuhaon na siya sa iyang kapuyo kay nag-uli na sila. Bisag giunsa og tambag ni Almira si Marivel nga di na makig-uli sa iyang kapuyo kay kulatahon lang gihapon siya ana pag-usab inig kahubog, di man maminaw. Ang gugma, gugma man gyud.
Inig labay sa lima pa himoon ka adlaw una mobiya si Marivel. Kutob pa sa tapos rong bulan sa Mayo. Gisayangan si Almira kay maayo motrabaho si Marivel. Ug kugihan kaayo. Di na kinahanglan sugoon. Nasayod na sa iyang buhaton. Mabuntag manglimpiyo siya sa tibook balay ug mag-mop sa sawog sa opisina sa bana ni Almira nga si Ritche. Unya manglaba tibook adlaw. Inig ka gabii mangutaw. Di siya palutoon kay di pa haniting mangluto. Apan kamao na sab siya. Si Almira lang ang mangluto.
Karong naghunahuna si Almira nga dako na sab iyang trabahoonon sa tibook balay inig biya ni Marivel, nagluya si Almira.
Anak si Marivel ni Teddylyn nga maoy unang katabang ni Almira. Si Teddylyn girekomendar ni Liclic kanhi katabang sab ni Almira. Si Liclic may karenderya na.
Balig usa ka bulan ra nga nagtrabaho si Teddylyn. Nananghid nga mopauli. Kay may problema sa ila. Iyang bana nga si Wilben tungod sa sakit nga dayabitis, naamnesia. Kun maglakawlakaw, di na kamao mopauli. Malimot sa iyang kaugalingon. Malimot na sa dalan pauli. Di na man gani kaila sa iyang kaugalingon. Labi pa nga di na kaila sa dalan pauli. Busa wa na lang palakwa ni Teddylyn. Kanunay nang gibantayan niya.
Si Marivel may anak usa nga hapit na mag-usa ka tuig. Si Roy Jr. Ang unang birthday sa bata karon sang umaabot nga tapos sa bulang Mayo. Naa ron ang bata sa ilang Teddylyn sa Lahug. Didto man unta puyo si Marivel sa Pagsabungan. Nag-abang silag balay ni Roy kay duol sa iyang trabahoan isip mason sa Maritrans Construction. Kasagaran si Roy mouli nga hubog. Unya yawyawan ni Marivel. Hisagpaan siyas kapuyo. Usahay makulatahan gyud. Dihang wa na siya kaagwanta, nipauli sa Lahug. Pagbiya ni Teddylyn sa ilang Almira, si Marivel ang gipapuli. Nakauyon unta siya sa iyang mga amo.
Ang duha ka mga anak ni Almira nga sila si Myrna ug Maricor mga dalaga pa, puro maayog batasan. Si Ritche nga usa ka abogado, wa say libog. Kun way bista, magsigi lag suwat sa iyang opisina nga sikit ra sa balay nilang Almira sa Canduman. Kun way suwaton, magsigi lag basa. Unyag laayan, mokanta sa sing-along luyo sa opisina nga gipanag-iya ni Idang. Macho og lawas ang abogado. Kay kada kaadlawon magduwag basketbol. Kun dili mag-jogging o kaha mag-hike. Nagbantay sa panglawas ang abogado kay gitambagan og doctor nga magbantay sa pagkaon kay dilikado na siya’g may dayabitis. Hilig na siya’g utan og isda.
"Ma'am" ni Marivel anang buntag sa kataposang adlaw sa Mayo.
"Unsa na Marivel?" ni Almira nga sayong nagdigamo sa kusina. Nagpahiyom bisag wa sa kondisyon.
"Nia si Roy ug si Junior. Kuhaon na ko nila" ni Marivel.
"Okay lang. Unya wa na koy utang nimo? Nasuweldohan na tika?" ni Almira. Bug-at kaayo iyang buot. Apan wa lang magpahalata.
"Natagaan na ko nimo gahapon, ma'am" ni Marivel nga mapahiyomon.
"Mobiya ka nga way dautang pagbati ngari namo. Nga wa ka pasipad-i sa pulong o sa buhat sa akong pamilya!" ni Almira.
"Ma'am pasensiya na ka nga makig-uli lang ko ni Roy. May anak man god mi. Nisaad man siya nga di na manapat. Unya pakaslan na ko niya. Unya niingon pa gyud siya nga puwede ba kono nga mosigi kog serbisyo nimo unya mouli lang magabii? Kay mamalik mig puyo sa Pagsabungan" ni Marivel.
"Nganong dili?" ni Almira. Nipahiyom.
"O sige ma'am. Mobalik ko sunod semana" ni Marivel.
Nitulo ang luha ni Almira sa kalipay. Namahid siya samtang nagsunod og tan-aw ni Marivel nga nagkabiba sa iyang bag. (Katapusan)