Alas 7:20 sa gabii ang pamuhi ni Alex sa College of Law sa University of San Sebastian. Naa sa 4th floor ang iyang room. Alas 6:20 sa sayong gabii namuhi na si Glenda sa Business Department sa maong unibersidad. Kay Pebrero 14 rong petsaha, sa niaging adlaw nagsabot na sila nga mag Valentine Date sila. Manihapon sila sa restawran nga ilang mapilian sa down town.
Graduating na si Alex sa law school. Si Glenda graduating sab sa kursong Accountancy. Didto lang una siya nagpalabay sa oras sa library samtang naghuwat nga mamuhi na ang klase ni Alex. Puro sila working student kay pobre ilang mga ginikanan ug daghan silang managsoon. Silingan ug kababata sila sa lungsod sa Valledupar, habagatang Sugbo.
Upat ka tuig nga wa kaeskuyla si Glenda sa kolehiyo kay dugay nakakitag arang-arang nga trabaho diin makalugar siyag eskuyla. Dihang nakatrabaho siya isip sekretarya sa usa ka abogadong dekampanilya, nakalugar na siyag tungha. Si Alex nakatrabaho isip Interpreter sa husgado. Maong nainteresado nga mag-abogado.
Insaktong alas 7:15 sa gabii, nigawas si Glenda sa library. Nihinay siyag lakaw ngadto sa room ni Alex mga usa ka gatos ka metros lang gikan sa library. Tulo ka tuig na silang uyab. Nagplano silang magminyo kun pasado na si Glenda sa board exams pagka-CPA ug si Alex sa bar exams. Nasugatan ni Glenda ang hinigugma nga nigawas na sa Room 427. "Hambogero!" matud sa lalaki nga nagsunod ni Alex. "Drug Lord!" nilingi si Alex ug nitubag. Iyang kaklase ang nisangpit. Gilainang naminaw si Glenda. "Mosugot lang diay siyag tawgong hambogero!" tuaw niya sa hilom. Apan nagkinataw-anay lang ang naghinganlanay og di maayo.
"Hambogero!'' may lain na sang kaklase ang nagsunod ug nisangpit ni Alex. "Carnapper!'' ni Alex. Unya nagkinataw-anay sila. Di lang kay lima lang ka lalaki ang nihingan ni Alex og hambogero. Duna gyuy ikatubag siya nga "Gambling Lord", "Rapist" ?Kidnapper" "Murderer" sa kada mosangpit niyag hambogero. Unya magkinataw-anay lang sila.
Nahibulong ug gilainan gyud si Glenda. "Nganong ginganlan ka man nilag hambogero? Unya sila nganlan sab nimog mas ngil-ad?" ni Glenda dihang sila nalang duha ang naglakaw sa koridor ug nahilayo na ang ubang mga estudyante. "Duna man god mi dramadrama nga mga kaso. Ako gitudlo sa among propesor nga fiscal o prosecutor. Sila mga criminal nga akong gipangkiha" ni Alex nga nag-agbay sa walang abaga sa hinigugma, ug morag nag-lecture. "Nganong di man fiscal o prosecutor ilang isangpit nimo? Hambogero man hinoon?" ni Glenda.
"Sa wa pa god magsugod among drama, dunay pangutana among propesor namong iyang mga estudyante. Duna siyay legal question sa panahon pa nga duna pay death penalty sa atong nasud. Kaniadto, ang priso nga bitayon, palingkuron sa electric chair. Pakuryentehan. Duna konoy konbiktado og dakong krimen unya bitayonon na. Gipalingkod sa electric chair. Gipakuryentehan og 10,000 volts. Wa namatay. Gidugangan ang power ngadto sa 20,000 volts. Wa gihapon namatay. Gihimo pa gyung 30,000 volts ang kuryente sa electric chair. Wa gihapon namatay ang bitayonon. Ang abogado sa bitayonon nipasaka og motion nga pabuhian na ang iyang kliyente kay gidili sa batakang balaod (Constitution) ang cruel and unusual punishment. Ang pagpakuryente sa bitayonon sa pinakataas nga boltahe, matud pa sa abogado, cruel and unusual punishment ngadto sa maong priso. "What can you say? Anybody?" matud sa among propesor. Wa gyuy nitingog sa akong mga klasmets. Unya niisa kos akong kamot. Gitudlo dayon ko ni Sir Tibon, among propesor. Nako pa, ang kastigo sa priso, death penalty by electrocution. Kun di pa siya mamatay, wa pa ma-carried over ang punishment. Busa, patyon gyud siya. Nakalitan among propesor sa akong tubag. Gitudlo ko niya ug namulong "Hambogero!". Kusog gyud kaayo iyang tingog. Sukad adto, hambogero nay ilang tawag nako. Makatawa nalang sab ko. Wa gani ko masayod kun husto ba akong tubag" ni Alex. "Makalibog man sab gyud ang balaod ba!" ni Glenda. Nikilo lang si Alex. Ug pag-abot nila tungod sa abli nga elevator nga paubos nga may tulo ka pasahero, nanakay sila. (Kataposan) (Sa gusto’g libreng kunsulta, dad-a ning pahina sa opisina sa tagsulat. Iatol og Sabado)