Estancia Ibabao, Mandaue City
He! he! he! mga agik-ik sa babaye ug lalaki sulod sa imbalming room sa punirarya nga gibantayan ni Butoy. Unya, iyang mabati nga maghagawhaway ug pipila pa ka gutlo ang nakalabay maoy iyang mabati ang kinagulkol ug agulo sa lungon.
Nalimbawot ang balahibo ni Butoy sanglit maoy iyang pagtuo nga ang mga namatay nga giimbalsamar sa sulod sa imbalming room nga nagkondinar ang ilang kalag maoy naghimo niini ngadto kaniya.
Wala mahimutang si Butoy sa iyang gilingkoran tungod sa gibati niyang kalisang. Ang iyang tuong kamot kanunay nga naggunit sa puan sa gitakin niyang armas nga kalibre 38.
“Pakita gani mo rong mga kalaga mo,” ni Butoy pa nga gibati na og kabugnaw sa iyang tingkoy. “Mamatay gyod mo sa ikaduhang higayon kun maigo mo sa bala niining akong armas.
Unang gabii pa nga nag-duty si Butoy sa maong punirarya isip guwardiya. Nagdumili unta siya sa pagdawat dihang iyang nasayran nga punirarya ang iyang bantayan. Apan gipugos siya sa ilang operation manager kay walay laing puwesto nga ikahatag kaniya.
“Ohhhh!!!!” nagpadayon ang agulo sa babaye nga giubanan sa nagkakusog usab nga hangus sa usa ka lalaki nga daw gihapu na sa pagdagan.
Nagkakusog ang agulo sa babaye ug nagkakusog usab ang hangus sa usa ka lalaki nga gidunganan sa kusog nga kinagulkol sa lungon.
Samtang nagkakusog ang inagulo sa babaye ug hangus sa lalaki daw misamot usab ang gibating kahadlok nga gibati ni Butoy ug nakahunahuna kini sa pagbiya sa maong punirarya.
“Pastilan,” ni Butoy pa sa iyang hunahuna.”Kun ako ning biyaan ako pod ang manubag kun mobanus ang mga kawatan.”
Mibarog si Butoy sa iyang gilingkoran. Naghunahuna kini kun unsay angay niyang himoon hangtod nga pipila pa ka gutlo ang nakalabay.
“Ah, bahala na,” ni Butoy pa sa iyang hunahuna. “Ako nga usa ka dakong buhi magpalupig og mga patay na?”
Gikuha ni Butoy ang flashlight ug mihinay sa pagpaduol sa pultahan sa imbalming room. Ug dihang nahidangat na siya sa pultahan iyang gihinay sa pagliso ang door knob sa pultahan alang sa pag-abli niini.
Samtang gunitan niya ang door knob sa pultahan daw wala na usab niya mabati ang agulo sa babaye ug hangus sa usa ka lalaki. Wala na usab ang kinagulkol sa lungon sa sulod sa imbalming room.
Miigot ang pultahan dihang hinay kining giablihan ni Butoy. Ug dihang naabli na kalit kining misinggit.
“Kun mga kalag mo pahawa,” ni Butoy pa nga nagkurog sa kahadlok. “Kun tawo mo pakitaaa!!!”
“Bay, Butoy!” ni Andot pa, ang imbalmer sa maong punirarya nga nagdali paggawas gikan sa sulod sa lungon. “Ako ni.”
Misunod usab sa pagbangon gikan sa sulod sa lungon ang hubo nga babaye ug dali kining nakasul-ob sa iyang sapot.
“Sorry, bay ni Andot nga nagtisngi nga nagtan-aw kang Butoy. “Si Charis akong uyab. Mahal man gud ang motel mao nga dinhi na lang mi.”
Walay nahimo si Butoy gawas sa paglingolino nga daw dili makatuo sa iyang nakita. (Katapusan)