GULA 131
Ang Mabini usa sa mga karaan nga lungsod sa lalawigan sa Bohol, busa ang kabalayan niini nagtipig pa sa handumanan sa panahon sa mga Kastila. Hinuon, daghan na usab ang mga balay nga natukod sa bag-ong panahon. Ang lugar nga nahisulod sa poblasyon sa lungsod sa kanhi kasagingan ug kaalbahakaan, karon gitukoran nag habog nga mga balay. Masabot nga ang panginabuhi sa katawhan sa lungsod misaka sa talay sa kama-arang-arang ug tubig-tubigan.
Nakalabay siya’g mga balay-kalingawan nga nanerado pa sanglit sa gabii pa man sila mangabli ug manawat sa mga kostumer. May nanaglumbay nga mga barbecue stand sa daplin sa dalan nga nagsugod nag paaso. Nakaalinggat siya sa Mabini Museum nga wala pa sa kanhing panahon. Sukad sa museyo, malantaw na ang plasa sa lungsod nga gipunsisokan sa daghang mga tawo. Gipahunong ni Carlo ang awto atubangan gayod sa pergola nga maoy nagsilbing main entrance ngadto sa plasa. Nanaog siya sa sakyanan ug mapanid-ong mianinaw sa palibot. Magkanunayan siya dinhi kaniadto sa nagtungha pa siya sa hayiskol sanglit duol ra dinhi ang eskuylahan. Namatikdan niya nga mas nindot na ang plasa karon kay sa kaniadtohay. Gi-develop na kini’g maayo. Napatahom kini pinaagi sa gipangtanom nga lainlaing mga bulak sa palibot. Ilawom sa nanubo nga mga kahoy may mga lingkoranang semento nga okupado sa mga tawo nga nagpalabay sa oras ug sa nagpares-pares nga mga batan-on nga nahingag sa pagbayloay sa mga pasalig bahin sa ulyahot sa gugma. Sa taliwala sa plasa nahimutang ang fountain nga nagpabuhagay sa matin-aw nga tubig. Sa palibot niini may mga bata nga nagdagandagan. May nanagbaligyag mga saging minantikaan, mani, candy ug ubang masimasima.
Dihay nakadapit sa pagtagad ni Carlo. Sulod sa plasa, habig sa kasadpan, nalantawan niya nga may gipunsisokan ang mga tawo. Nadani siya sa pagduol aron magsusi kun unsay gitapokan sa mga tawo. Apan dili na siya makauliot kay naghuot na ang mga tawo nga nanag-alirong. Nangutana na lang siya sa lalaki nga diha sa iyang duol kun unsay nahitabo. Nakapanglingo siya sa tubag sa lalaki. Mao diay gialirongan sa mga tawo ang usa ka madyikero nga matud pa, magputol kuno sa kaugalingong ulo aron pagpakita sa katawhan sa nahuptan nga abilidad. -- Sumpayan pa