Gula 128
“Gipahibalo na nako ang kadagkoan sa simbahan sa imong tinguha paglumpag sa Tambayawan,” tug-an sa pari. “Nahinangop sila pag-ayo. Gikalipay nila ang imong gibuhat. Nila pa, ang sama nimo maoy gikinahanglan sa katawhan sa Dios aron masumpo ang mga tawo nga nagtinguha sa pagpanamastamas sa pagtuong Kristiyanismo.”
“May dakong katarongan kun nganong nanginlabot ako niining maong problema, Padre,” mipasabot si Carlo. “Una, lumad ako nga taga-Mabini. Dili ko buot nga maguba ang maayong imahen niining lungsora tungod sa pagdagsang sa mga krimen. Ikaduha, sakop usab sa Tambayawan ang suspek sa pagpatay sa akong mga ginikanan. Ug ikatulo, mao kini ang misyon nga gisangon kanako sa VIDA tungod kay ang nagpatay sa akong mga ginikanan mao man usab ang suspek sa kamatayon sa usa namo ka kaubang detektib.”
Domingo sa palis. Si Carlo Guieb nga mao rang usa sa balay mibati og kalaay. Mao ray nahimo niya sukad sa buntag ang pagtuon sa bag-ong mga kasayoran nga iyang napunpon mahitungod sa Tambayawan Black Brotherhood. Iyang gipinig ang mga impormasyon nga gituohan niyang balido nga ikadugang sa una niyang nahagdaw nga mga kasayoran. Gibati niya ang kakapoy tapos sa makuti niyang paghashas sa mga kasayoran nga iyang nahipos.
Nakahunahuna si Carlo nga hatagan una niya’g hamubong higayon pagrelaks ang iyang kaugalingon. Total, adlaw man nga Domingo. Niini gong nanglabay nga mga adlaw, napulos lang bahin sa kaso nga iyang gigunitan ang iyang gibuboan sa iyang panahon. Maoy nagpasulabi ang iyang tinguha nga masulbad pagdali ang krimen nga nanghitabo sa lungsod sa Mabini.
Migawas siya sa balay tapos makailis ug misakay sa iyang awto. Gipasutoy niya kini pagpadagan paingon sa merkado. Buot siyang mosuta sa kinaiya sa katawhan sa lungsod tapos sa pipila ka tuig nga nahilayo siya sa maong dapit. Tan-awon niya kun wala bay kausaban ang kagawian sa mga lumolupyo sa Mabini sa kaniadto ug karon nunot sa pag-uswag sa buhilaman. -- Sumpayan pa