Samtang nanghapnig si Atty. Roy Zapanta sa mga papeles ibabaw sa iyang lamesa, nasigpatan niya ang folder sa kaso nga Tibon versus Arcilla. Siya ang abogado ni Marjorie Arcilla. Dili niya kapugngan nga magduda gyud nga dunay madyik gihimo si Atty. Byron Espino, abogado ni Wilben Tibon. Kay gamiton ang lamesa alang sa ilang Christmas Party karong gabii, sa mga sakop sa iyang bupete, gihiklin una niya ang mga papeles ngadto sa steel cabinet.
Unya, lahi gyud iyang gibati pagkakita ni Roy ining case folder sa Tibon versus Arcilla. Ning hapona, nibira si Roy og plastic nga lingkuranan ngadto duol sa bintana. Nilingkod siya ug gipasihag niya sa hayag gikan sa bintana ang Special Power of Attorney (papeles nga naghatag og authorization) pabor ni Atty. Espino. Nagduda gyud si Roy ining dokumentoha.
Si Marjorie nakapalit og yuta sa lungsod sa Miraflores gikan sa mga sumusunod ni Ritche Tibon. Sila si Lina Tibon ug Glenda Tibon ang nagbaligya ngadto ni Marjorie. Ang nagpirma sa deed of sale, sila lang si Lina ug Glenda. Bag-o lang nasayod si Marjorie nga tulo diay ka buok ang mga anak ni anhing Ritche. Pagkonprontar ni Marjorie ngadtong Lina ug Glenda, (dihang gikiha na si Marjorie ni Wilben og kaso nga partition kay bawion ni Wilben iyang usa sa tulo ka bahin (1/3), gihatagan si Marjorie ni Lina ug Glenda og deed of sale nga sinulat sa kamot ug dili notaryado, nga pinirmahan ni Wilben pabor sa duha ka mga igsoon. Niadto pang dekada 50, gibaligya na ni Wilben iyang bahin ngadto nilang Lina ug Glenda. Gani, ang kuwarta nga halin, maoy gibawon ni Wilben sa iyang pag-adto sa Amerika. Sukad adto, wa na gyud nipauli si Wilben sa Pilipinas. Unya si Atty. Espino nipahibawo ni Roy nga nipauli kono si Wilben duha ka tuig na ang nakalabay. Ug nipirma kono si Wilben og Special Power of Attorney nga ginotaryohan og laing abogado. Ang maong dokumento nag-otorisar ni Atty. Espino nga representahan si Wilben sa pagtambong sa pre-trial sa kaso.
Ang pre-trial maoy hugna sa kaso nga kinahanglan motambong gyud linawas ang kihante ug sinumbong, sa husgado. Kun dili katambong ang kihante unya way balido nga representante, puwede ipa-dismiss ang kaso. Mao nay gitawag sa legal nga pulong "non-suited". Kun ang sinumbong di katambong unya way balido nga representante, mahulog siya'g default. Mapildi siya pinaagi sa default. Sa pre-trial sa maong kaso, si Atty. Espino ra ang nitunga.
Dili maayo ang reputasyon ni Atty. Espino. Nabaniog na sa mga tabitabi tali sa mga huwes ug mga abogado nga mahilig si Atty. Espino momaniobra og dokumento. Bisan gani'g patay na, ang konohay nipirma sa dokumento, notaryohan niya basta makabayad lang sa iyang presyo ang nagpanotaryo. Maong nagduda gyud si Roy nga may madyik gihimo si Atty. Espino.
Pebrero pa sunod tuig ang bista diin mopresentar na og ebidensiya si Atty. Espino. Apan kun mapa-dismiss ni Roy ang kaso, di na mahinayon ang maong bista. Gisiksik pag-ayo ni Roy ang dokumento nga gidudahan niyang gimadyik. Gikan sa pirma ni Wilben, mga pirma sa testigos ug pirma sa notaryo publiko. Wa kaila si Roy ining Atty. Noel Penaflor kun abogado o notaryo publiko ba gyud siya tinood.
Luta kaayo ang notarial seal kon selyo sa ubos sa walang eskina sa dokumento. Dili ngalan ni Noel Penaflor ang mabasa. Ngalan ni Atty. Byron Espino ang nabasa ni Roy. "Niara ang madyik!" tuaw niya sa hilom nga gibatig tumang kahinam. Dili tinood nga abogado o notaryo publiko ang nagnotaryo sa maong dokumento. Kay way notarial seal ang maong notaryo. Ang gigamit nga notarial seal, selyo mismo ni Atty. Espino. Dakong palsipikado.
Mahulog rag si Atty. Espino mismo ang nagnotaryo sa SPA nga naghatag niyag gahum o katungod sa pagrepresentar ni Wilben sa pretrial. Nagduda gani si Roy nga sa gidugayon sa panahon nga nagpuyo si Wilben sa American (sobra 60 anyos) namatay na kini.
Gitawag dayon ni Roy sa telepono si Marjorie aron pagbalita sa iyang nadiskubrehan, ug aron mangayog pinaskohan ug pasiunang attorney's fees, alang sa Motion To Dismiss nga iya unyang isumiter sa husgado. (Kataposan) Alang sa magbabasa nga gusto’g libreng konsulta, dad-a ning pahina sa opisina sa tagsulat. Iatol og Sabado)