Gula 20
Nagmalamposon ang pag-opera kang Nang Marciana. Sangko sa langit ang pagpasalamat ni Urielle nga wala’y nahitabong kakulian sa pagpahigayon sa operasyon sa iyang inahan.
Apan kinahanglan pang magpabilin si Nang Marciana sa tambalanan aron kanunay kining maatiman sa mga mananambal. Si Urielle ang mitanod sa pagbantay sa iyang inahan. Si Noy Sidro kanunay mopauli ngadto sa Tuburan aron pagsusi kun giatiman ba’g maayo ni Raymond ang ilang hayopan.
Gumikan sa pagkatanggong ni Nang Marciana sa tambalanan, nadugangan ang kantidad nga nautang nila ni Urielle ngadto kang Don Emilio Arcanghel. Maayo gani kay gaan usab kaayo ang kabubut-on ni Don Emilio Arcanghel nga mitabang kanila. May mga higayon nga motuyo gayod pagduaw si Don Emilio sa ospital aron pagsusi kun unsa nay kahimtang sa inahan ni Urielle.
“Maayo gyud kaayo si Don Emilio nato, Tay, no,” nagkanayon si Urielle usa ka higayon niana nga diha silang duha si Noy Sidro sa sulod sa ward nga nahimutangan ni Nang Marciana. “Maila nga kinasingkasing gayod ang iyang pagtabang. Nagpakabana gayod siya sa nahitabo kang Nanay.”
“Tinuod kana,”ni Noy Sidro pa. “Dili na ko makakita’g agawon nga sama kaniya’g kinaiya. Masinabuton siya ug matinabangon. Maantigong mosabot sa kahimtang sa mga kabos. Lahi siya sa ubang adunahan.” -- Sumpayan pa