Gula 16
“P-pila man diay?”
“P180,000.00.”
“Kadako ba sab?”
“Mao may gisitar sa doktor.”
“Kun may kuwarta pa lang unta ko, Urielle, di na unta kinahanglan nga mangutang pa mo. Pero unsaon, naay akong tinigom nga alang sa umaabot natong kaminyoon pero dili makaabot sa maong kantidad.”
“Sagdi lang, Nelson. Masulbad ra gihapon ning problemaha. Mag-ampo lang ta nga dili pakyason si Tatay ni Don Emilio Arcanghel sa tuyo niya ngadto niini.”
Hinay nga milihok si Nang Marciana didto sa gihigdaan niini. Nahigmata kini. Mihinay pagduol sila si Urielle ug Nelson ngadto niini.
Nahibalik si Noy Sidro sa siyudad nianang pagkaugma sa buntag. Naabtan niini sila si Urielle ug Nelson nga nag-apong kang Nang Marciana. Si Nelson wala mobiya sa tambalanan sa tibuok gabii aron may kauban si Urielle sa pagbantay sa iyang inahan. Natulog pa si Nang Marciana hangtod niining higayona.
“U-unsay resulta sa imong lakaw, Tay?” Gisukit gilayon ni Urielle ang iyang amahan.
“Nakadala ko’g kuwarta, Urielle,” malipayong tubag sa amahan. “Gipautang ko ni Don Emilio Arcanghel.” -- Sumpayan pa