Gula 10
Lahi sa una nilang kumbati sa kama didto sa hotel nga nagdali ang Amerkano, karon ning ikaduha nila nga panag-uban ug ni Vannesa kalma na ang langyaw.
Nahuna-huna ni Vanessa nga tingali tungod kini kay tibuok adlaw ugma anaa ra man gihapon siya uban kang Nichols ug bisan unsang orasa walay makapugong kanila.
Lalim kaayo ang ilang panag-uban ni Vanessa ug Nichols sa kwarto sa hotel. Nangatulog ra sila nga parehong walay mga sapot. Mga alas singko sa kaadlawon, mibangon si Vanessa ug naligo dayon siya sa banyo. Wala pa gihapon makamata si Nichols.
Mibalik siya pagtupad og higda sa langyaw ug diha pa nakabantay ang Amerkano kay nabag-id ang bugnaw na niyang lawas. “Hi, Good morning Van,” gipaubanan og hawok sa Amerkano ang pag-greet niya ni Vanessa.
Mibangon si Nichols ug naligo. Gisul-ob ni Vanessa ang iyang sapot ug nangareglar sa iyang kaugalingon atubangan sa samin.
Presko na kaayo siya nga sud-ongon ug milutaw na usab ang iyang kaanyag.
“Wow, you’re so beautiful,” nakatuaw ang langyaw sa dayon niyang gawas gikan sa banyo.
Human og ilis sa Amerkano sa iyang sapot, nanggawas sila si Vanessa ug mipaingon sila sa groundfloor sa hotel aron mangaon.
Wala tuyoa nga didto usab mikaon si Choy, ang usa sa nahimong customer ni Vanessa kaniadto. Mitagad kini kaniya apan wala kaayo siya magdugay pakigsulti. “Choy meet my husband, Nichols, he is in our country to fetch me,” kalma nga pamahayag ni Vanessa nga mora usab og tinuod.
“Ah mao ba? He is very lucky,” matud ni Choy nga aron moluba ang atay sa Amerkano. Igo lang mipahiyom ang langyaw.
Didto sila si Vanessa ug Nichols manglingkod sa layo-layo nga lamesa gikan sa nahimutangan ni Choy. Samtang nagpaabot sa ilang pagkaon nagsultihanay ang duha.
Giingnan ni Vanessa ang Amerkano nga si Choy usa sa mga lalaki nga naibog kaniya apan wala niya tagda. Miyango-yango ang langyaw.
“You know Van, my real purpose of visiting the Philippines is to look for a girl to be my future wife because my friends told me that Filipinas are caring, thoughtful and most of all loving to their husbands,” matud ni Nichols.
“When I heard you telling Choy that I’m your husband, I’m so happy and wanted to be your real husband. Is it possible?” matud ni Nichols dayong pig-it sa kamot ni Vanessa.
“Sure,” dali nga tubag ni Vanessa. Human sa ilang pagpangaon, namalik sila sa kwarto sa hotel ug nagparayganay na usab.
Gidala ni Vanessa si Nichols sa ilang balay sa Echavez ug gipaila-ila sa iyang mga ginikanan nga maoy umaabot niyang bana. -- Kataposan