Hu! Huh! Hu! Mag-unsa na lang unya ko kun mawala ka! Gagmay pa atong tulo ka mga anak! nagdangoyngoy si Norelyn sa walang kilid sa katre nga gihigdaan ni Atty. Wilben Duhig sulod sa ospital. Maoy namat-an ni Wilben karong buntaga ang kasaba sa hinilak sa iyang kapikas. "Hain man diay ko?" ni Wilben nga daw gialimungawan. Mobangon unta. Apan napugngan siya sa kasakit sa iyang dughan. May dakong bandahi libut sa iyang dughan ug bukobuko. Niping-it siya sa kasakit ug nibalik paghigda. Ug nakahinumdom siya sa nahitabo.
Niadtong Disyembre 10 sa alas nuybe sa gabii, nipauli siya nga nagmaneho sa iyang sakyanan gikang nitambong og Christmas Party. Pagliko pa lang niya sa eskina padulong sa subdivision nga iyang gipuy-an, nakadungog siyag duha ka buto sa pistola. Unya nawad-an siyag panimuot. Nihukdong siya sa manibela sa Pajero nga itom. Nabangga iyang sakyanan sa poste.
"Kinsay nagdala nako dinhi?" ni Wilben nga nakaamgo nga naa siya’s ospital. "Mga pulis maoy nitabang nimo. Suwerte nga nadungog nila ang buto-buto kay nag-checkpoint sila mga usa ka gatos ka metros gikan sa eskina nga nahitaboan. Tulo ka buto ilang nadungog. Unya nakita nila ang Pajero nga nidasmag sa poste" ni Norelyn. "Duha ra man ka buto akong nadungog" ni Wilben. "Ang ikatulo ka bala maoy nakaigo nimo. Kay faster than sound god na ang bala. Wa na kay panimuot pag-abot sa ikatulong buto sa imong dunggan" ni Norelyn. "Mao ba?" ni Wilben.
"Kalimti na nang ambisyon nimo sa politika. Kay nagpalakaw ka’g tabi nga molansar ka pagkamayor sunod tuig sa atong lungsod, na-insecure seguro ang incumbent nga mayor" ni Norelyn.
Nakapanghupaw si Wilben. Nasayod siya nga way labot ang politika sa nahitabo niya.
May mga kliyente siya nga gibinuangan. Tungod sa bisyo sa sugal sa casino ug badyikdyik, kulang ang iyang dakong kita sa panglaban. Hinoon kontento iyang kapikas sa intriga niya nga di mominus sa trayenta mil ang bulan. Apan kun iapil ang kita niya sa pangilad sa kliyente, di mominus sa siyen mil pesos ang bulan. Gikawkaw niya ang kuwarta sa iyang mga kliyente nga nisalig niya.
Ang pinakagrabe niyang natulis si Mr. Fernando Lapaza nga nibahad gyud niya’g dautan. May gibaligyang yuta si Mr. Lapaz. Si Wilben ang gipahimo sa tanang dokumento. Siya sab ang gipadawat sa halin, P1,300,000 ang presyo sa yuta. Nihangyo ang buyer nga gamay lang kantidad ibutang sa dokumento. Aron gamay ra iyang mabayran sa buhis. Gipirmahan ni Mr. Lapaz ang deed of sale nga balig, P300,000. Si Wilben ang nagnotaryo sa dokumento. Huma’g dawat ni Wilben sa kuwarta nga halin, iyang gitawag si Mr. Lapaz nga panahon sa iyang opisina. Pag-anha, P300,000 ray gihatag ni Wilben ngadtong Mr. Lapaz. "Nganong kini ra man?" ni Mr. Lapaz nga naisang kilay ug nangunot ang agtang. "Kana ra mang kantidara ang naa’s dokumento!" pintok nga tubag ni Wilben. Gibulsa niya ang usa ka milyon. Nagpanglingo si Mr. Lapaz nga nitindog. Ug nagbilin og hinay nga pulong pagdayog biya. "Sigi lang attorney. Kay ipapusil lang tika!"
"Kalimti na nang imong ambisyon sa politika. Bahala’g gamay ka’g kita sa imong panglaban, kontento na ko" ni Norelyn nga padayong nagmaymay ni Wilben.
"Pila man ko ka adlaw dinhi?" ni Wilben. "Lima ka adlaw kang coma. "Through and through kuno ang imong samad sa bala. Ubos sa walang ilok ngadto sa toong ilok. Usa ka pulgada lang nga imong kasingkasing nalabyan sa bala. Maayo kay way mga internal organs nga naigo, matud sa Doktor" ni Norelyn. Hilom si Wilben nga nagpasalamat sa Diyos nga gihatagan pa siya’g ikaduhang kinabuhi. Nakahukom siya nga magbag-o.
"Sukad karon, di na ko mag-apil-apil sa politika. Magbag-o na ko," niya pa. Nigakos niya si Norelyn sa kalipay. Ang iyang gipasabot, mobiya na siya sa sugal ug pamabaye. Ug tumanon sab niya ang iyang gisulti. Unya naa’s iyang hunahuna nga mangutang siya’s pipila ka kliyenteng nisalig pa niya, aron ibayad sa iyang natulis sa mga kliyenteng nabiktima. Dili pa ulahi ang pagbag-o. (Kataposan) (Alang sa magbabasa nga gusto’g libreng konsulta, dad-a ning pahina sa opisina sa tagsulat. Iatol og Sabado)