Kras! Pak! Blog!" May nipaka sa atop sa tindahan ning sayong kahaponon. Daw may usa ka bloke nga hollowblock nga nahulog gikan sa panganod ug nitugpa sa sin nga atop sa tindahan. Nakurat ang lima ka mga estambay sa tindahan. Daling nanindog sila si Alex Tudtud, Richard Dagoc, Jomar Suprema, Romeo Brusas ug Jerome Bertes.
Nangandam sa pagdagan. Kay basig ang butang nga gilabay o nahulog, molahos og kahulog sa ilang nahimutangan. Delikado’g maigo sila. O kaha usa, duha o pipila ba kanila ang mahulgan o maigo. Sa kasipa sa paghagsa, seguradong bug-at ang maong butang.
"Kasayo ba sab anang namato!" ni Alex nga maoy liderlider sa managbarkada. "Wa pa man gani niinit atong lubot sa pagliningkod, gipareglahan man dayon ta!" ni Richard nga gitahod sa grupo nga luyoluyo sa pangulo. Naniga ilang lima ka parisan nga mga mata.
Ang tindahan gipanag-iya sa managtiayong Byron-Norelyn. May duha sila ka mga anak. Kinder 1 na si Mary Grace. Si Mary Jane tulo ka buwan pa nga puya. Sarisari ang maong tindahan. Pero naglabi ang tinda nga junk foods ug mga duwaan. Kay kadaghanan sa ilang mga kustomers, mga bata. Duol mag eskuylahan sa elementarya ang tindahan. May trayente metros gikan sa gate sa Sibundoy Central School.
Natukod ang tindahan sa amihanang habig sa dalan Fernando Lapaz. Tres sintos metros ang gitas-on sa maong dalan nga sementado. Sa tumoy sa dalan padulong sa kasadpan, naa ang gate sa tunghaan. Sa pikas tumoy padulong sa silangan, naa ang luyo sa munisipyo sa Sibundoy.
May nikrus nga laing dalan. Usa ka kilometro ang gitas-on sa dalan Edward Cuenca nga nikrus sa dalang Lapaz. Singkwenta metros sa silangan sa tindahan ang gilay-on sa eskina sa dalang nagkuros. Sa habagatang tomoy sa dalang Cuenca, naa ang simbahan sa San Sebastian. Sa amihanang tumoy, ang merkado sa lungsod.
Sikit ang toong eskina sa tindahan, pinakaduol sa karsada, may dako ug taas nga punoan sa Nangka. Dagha’g bunga. May napulo ka dagkong bunga sa punoan nga maabot rag tawo. Giputos ni Byron og mga basiyong sako sa bugas. Mora na kadak-ag baboy aslonon ang mga bunga. Wa pa nanghumot. Guwang na. Pero di pa hinog. Tanom pa ni ni anhing Tatay Efren ni Byron. Dugay nang nitaliwan ang tiguwang nga biyudo. Kay bugtong anak si Byron, napanunod niya ang tindahan ug balay ug yuta sa luyo niini.
Sa ubos tungod sa mga bungas nangka nga pinutos, may taas nga bangko nga nagtaas padulong sa karsada. Dinhi nanglingkod ang lima ka estambay. Dili sila mga bugoy.Puro sila estudyante sa hayskul. Tumatapos na. Wa lang silay klase ron. Maong naglingaw-lingaw og suruysuroy o estambay.
Naniid silang lima kun may mokaral pa ba sa atop. Wa na. Nagpasabot nga ang butang nitugpa sa atop, nagpabilin sa atop. Sirado ang tindahan karon kay Sabado. Nanimba ang managtiayon uban sa duha nila ka anak. Mga Sabadista man sila.
Unya may sinating baho nga nanuhotsuhot sa kahanginan. Timailhan nga may hinog nga nangka. Gipamikpik nilang lima ang mga pinutos nga bunga. Di pa hunob og tingog. Wa say baho. Wa pay hinog sa pinutos.
Nisaka si Alex sa punoan. Nakita niya nga ang nitugpa sa atop sa tindahan, hinog diay nga nangka. Wa naputos kay tua nitubo sa tumoy sa punoan. Sipa ang lagobo sa pagtugpa sa atop tungod sa kahabog sa gigikanan sa pagkahulog. Nalumping gani ang sin ug niluta ang katunga sa lawas sa bunga.
"Huwaton nato nga mauli si Noy Byron. Aron pahibaw-on nato sa nahulog nga hinog nga nangka" sugyot ni Alex. Mahinamon. "Aron ta makatilaw kay di man dawo nang tawhana" timang ni Richard. Naghinamhinam sab. Ug nagkasabot ang lima nga mopadayon sila's ilang pag-estambay. Kay seguradong pamalihogon ang usa nila sa pagkatkat aron pagkuha sa nangka sa atop. Aron di masayang ilang panahon sa pag-estambay kay seguradong patilawon man gyud silas bunga. (Kataposan)