Gipaningot ug hilabihang luspara ni Nang Fritzie sa dihang kalit siyang gibitad sa usa ka tulisang buot mopahilayo sa mga tinugyanan sa balaud nga nigukod kaniya. Ang tulisan dali-daling nition sa dala niining armas de-fuego ug gipunting gilayon tumong sa ulo ni Nang Fritzie ug maisugon kining namulong:
“Pasagdi ko ninyong makaeskapooo! ... Kung dili mo gustong patyon ko kining bayhana!!! Disperado niining bahad ngadto sa mga pulis nga ning alirong kaniya.
Ug diha-diha ang mga tinugyanan sa balaud nidistansya ug gipaundayonan sa makadiyot ang maong tulisan ug nagplano og tukmang lakang aron pakgangon ang maong tulisan ug makuhang luwas ang gi-hostage niini.
Ug sa pila ka gutlo sa maong sitwasyon nagpunsisok ang mga usisero nga wala panumbalinga ang kakuyaw. Ug tungod niini naglisud ang kapolisan sa pagpakgang sa kadaghan sa tawong nanguryoso.
“Dong, unsa may problema nimo?... Kabata pa nimo ... ayaw usiki ang imong kinabuhi ... may kahigayonan pa ikaw sa pagbag-o,” ni Nang Fritzie ngadto sa tulisang ning- hostage kaniya.
Sa taud-taod nga pagmaymay ni Nang Fritzie ngadto sa maong tulisan nabatyagan niyang nilugak ang pagtuok kaniya...
Ug tungod niini nakahuna-huna si Nang Fritzie nga ipadayon ang pagmaymay niini.
“Tigulang na ako Dong! ... Dili ko igsapayan kung kutloon mo ang akong kinabuhi ... Sigurado ako nga mahilangit gayud ako ... kahibalo ka Dong ... may mga resita akong kinahanglang tumaron matag-adlaw ... may sakit ako ... Hinay na ang pitik sa ‘kong kasing-kasing”, ni Nang Fritzie pa nga pinugngan ang mga luha.
Ug sa wala damha ang notadong tulisan kalit kining ning hilak ug gibuhian si Nang Fritzie sa wala matinong hinungdan.
Ug diha-diha ang mga polis nga sa daw nakalitan sa maong panghitabo gadaling ningpaduol ug gisikop ang maong tulisan. Basin og mausab pa ang huna-huna niini.
Gipusasan kini og gisakay sa patrol car ug gidala dayon sa labing duol nga presinto ug aron pasakaan og tukmang kaso.
Ug sa maong hitabo pabiling tanghaga kay Nang Fritzie ug sa tanang nakasaksi kung unsa ang matuod nga rason ug nganong nalukmay ang kasingkasing sa notadong tulisan.
Ug didto sa presinto uno diin gidala ang maong tulisan nagpunay kini og panawag og mama.
Ang matuod diay nganong nalukmay ang maong tulisan ... Tungod kay may inahan pud kining susama ang sakit nga gihambin ni Nang Fritzie ug maihap na lang pud ang mga adlaw niini.
Ug mao kini ang nagtukmod sa maong tulisan nga mohimo’g salaod alang-alang sa mga panginahanglan sa iyang pinanggang inahan. (Katapusan)