Buntag nang nahiuli si Tomas. Ug sama sa naandan makita siyang magtakliay sa iyang gitara. Daghang nag-ingon nga si Tomas nagtrabaho sa usa ka Night Club sa siyudad isip usa ka Folk Singer. Nindot gyud hinuon mokanta kini si Tomas.
Naay tingog nga bugnaw kaayo ug unya mora ka’g bation og kamingaw sa higayon nga mabati mo ang tingog niini. Bisan gani dinhi sa ilang lungsod kun dunay mga okasyon ang ilang mayor si Tomas man dayon ang kuhaon aron lang pakantahon sa mga binisaya nga mga awit nga siya ra poy nagtagik. Makalingaw ang mensahe sa awit ni Tomas ug ganahan kaayo ang mayor ug labi na gyud ang taga Munisipyo maminaw sa awit ni Tomas.
“Bay, Bay Tomas, tinuod nang tua ka na karon magtrabaho sa siyudad -- sa usa ka Night Club?” ni Santos pa nga silingan nilang Tomas.
Miyango lang si Tomas nga walay mga pulong nga nanggawas sa iyang baba.
Ug mao na kini matag buntag ila gyung makita si Tomas nga luya kaayong manaog sa Bus ug magtakliay sa iyang gitara ug sa usa ka pack bag sa iyang likod. Inig ka gabii, ilang makita si Tomas nga manaog sa ilang balay ug ispoting na kaayo. Dala na niini ang iyang gitara ug nagtakliay na usab sa iyang pack bag. Sa ilang mga silingang dalaga si Neria ra gyud ang dunay hilom nga pagbati kang Tomas apan ingon sa wala lang makadiparal si Tomas sa kaanyag ni Neria. Maayo usab nga mokanta si Neria. Nindot ang iyang estelo sa pagkanta ug kadaghan na kini makadaog og mga “Tigiay sa Awit” sa mga pangilin sa Kalungsoran nga iyang apilan. Duna na gani usa ka tag-iya og usa ka Recording Studio nga mi-offer kang Neria nga siya maoy mokanta sa usa ka awit nga tinagik sa usa ka inilang Kompositor sa siyudad apan nagdumili si Neria sa katarongan nga dili pa siya andam nga mahimong usa ka recording artist. Ug bahin kang Tomas matag buntag makita usab siya ni Neria nga luya na kaayong mopauli sa karaan nilang balay. Unya, usa ka hapon, may balita silang nadungog nga gisibya sa radyo nga duna kunoy usa ka mangtas nga mamiktima og mga dalaga ug ang mga dalaga nga biktimahon niini pulos mga maanyag ug madani gyud kuno ang mga dalaga sa tingog sa maong mangtas nga ungo nga mokanta kuno panahon sa kagabhion sa tungod sa kuwarto sa dalaga. Hinuon, dili niya balbalon ang dalaga pero mamahimo na niya kining hinigugma. May nakakita sa maong mangtas. Kuloton ang buhok ug may pagka-mestisuhon kuno ang bayhon niini. Ug piting kaayo ang karsones nga maong nga isul-ob niini ug kanunay’ng magtakliay sa gitara nga maoy iyang iduyog sa iyang pagkanta.
“Uy, di ba mora ma’g tukma sa bayhon ni Tomas ang gisulti sa magsisibya sa radyo, Nay Isyang,” ni Neria pa. “Magdaladala gud og gitara si Tomas ug buntag nang mahiuli...”
“Dili tingali, uy. Pero, kaliwat baya na sila’g mga ungo, Neria,” hinay ang tingog ni nang Isyang, inahan ni Neria. Wala na lang motingog si Neria kay sa pagkatinuod lang si Tomas ang gipitik sa iyang kasingkasing. Ning higayona nakahukom siya nga adtoon niya si Tomas sa karaan nilang balay. Sutaon niya kun tinuod ang iyang pagduda sa ulitawo segun sa gisibya sa radyo. Kilumkilom, ug hiabtan ni Neria si Tomas sa ilang balkon nga naglingkod nga naglantaw sa talisalop nga buwan didto sa sidlakang bahin sa kalibotan.
“Dayon, dayon, Neria. Kay nia ka man dili na lang ko moadto sa inyo,” ni Tomas sa kalma nga tingog.
“I-ikaw moadto sa amo, Tomas. Ngano man kuno?” nagpakisayod si Neria.
“Moadto ko, aron haranahan ka. Ikaw man gud ang “Rayna” sa akong kasingkasing, Neria. Oo, dugay na, ug daghan nang mga babaye nga gusto kong higugmaon, apan, wala sila makapapitik sa akong kasingkasing. Tingali, nahibawo ka na sa balita bahin sa usa ka mangtas nga magdaladala og gitara ug unya mamiktima og mga babaye. Oo, ako kana, Neria. Ug suwerte ko kay nia ka karon dinhi sa akong balay...” Mikatawa si Tomas.
Ug kay nahigugma usab siya kang Tomas, wala mahadlok si Neria sa iyang nadungog gikan sa ulitawo. Hinunoa, miduol siya kang Tomas ug mitupad sa paglingkod sa ulitawo. Unya gipaak ni Tomas ang liog ni Neria apan wala ipadulot ang iyang mga ngipon, dayon iyang gitilapan ang dapit sa ubol-ubol sa dalaga nga gibati na karon og kagilok ug mikagiki sa pagkatawa samtang sa sidlakan misubang na ang buwan. (Kataposan)