Taud-taud gyud ang ilang panagsultihanay ni Lyn ug Atty. Razon. Batan-on pang abogado si Atty. Razon.
“Mahimo ba og mangayo ko og contact number nimo sa cellphone?,” nagpahiyom si Atty. Razon nga nangutana sa dalaga kinsa dali kaayo nga mitug-an sa iyang numero.
Hangtud nga misugod na ang programa sa party. Si Lyn maoy nag-emcee sa maong kalihukan.
Lingaw kaayo ang mga nanambong sa maong higayon ug gani sa daklit nakalimtan ni Lyn ang iyang masakit nga kaagi. Dayon miduol si Beth ug mipahibalo nga duna siya’y giandam para raffle.
Wala gyud swerteha si Lyn sa raffle. Miabot na lang ang para sa grand prize diin si Beth ang mikuot sa mananaug nga numero.
“Ang giswerte karong gabhiona! Walay lain kun dili ang batan-on ug ambongan ta nga abogado, si Atty. Razon!,” singgit ni Beth dihang nabunot na ang raffle stub sa abogado.
Usa ka mahalon kaayo nga digital camera ug may pakapin pa nga P20,000 ang grand prize.
Miduol si Atty. Razon ni Beth ug Lyn nga nagpahiyom. “Lyn congratulations!” “Uy, ikaw ang akong i-congratulate atorni kay grand prize gyud ang imong gidaug, ako wala g’yud gani bisan consolation prize,” matud ni Lyn nga nagngisi.
Gikuha ni Atty. Razon ang microphone gikan ni Lyn ug mihimo siya’g pahibalo. “Tungod sa diwa sa pasko, ang akong nadaug gikan sa atong kompaniya karong gabhiona, akong ihatag sa maanyag ninyo nga supervisor nga karon pa nako nakaila… si Lyn!”
Gitunol dayon ni Atty. Razon ang nadaug niya nga digital camera ug ang P20,000 ngadto ni Lyn. Wala tuyoa ni Lyn nga nagakos niya ang abogado sa grabeng kalipay.
Nahimuot usab kaayo si Beth ug ang mga kawani sa ilang nakita. Sayud sila nga walay hinigugma si Lyn. Duna g’yuy gwatsinanggo nga misinggit “Kiss! Kiss! Kiss!”
Apan lahi nga pagka lalaki si Atty. Razon wala siya magpaabot nga hagkan ni Lyn sa publiko. Mibalik siya paglingkod ug gisunod lang pagtan-aw ni Lyn.
Human sa kalihukan giduol ni Atty. Razon si Lyn. “Ihatud ko ikaw pagpauli Lyn, pero gusto usa ko nga magselebrar kita sa atong panagkaila.”
Giingnan ni Atty. Razon si Lyn nga dili mabalaka kay nananghid na siya ni Beth nga dad-on siya’g panuroy human sa party.
Miduol si Beth kanila. “Lyn buotan si Atty. Razon ug nananghid siya kanako nga makigpanuroy kanimo dayon ihatud ka niya sa balay.”
Wala makabalibad si Lyn sa pagdapit kaniya sa abogado. (Sumpayan pa)