Gula 33
Gidaygan nako si Gelia sa nag-uros-uros kong pagbati ngadto niya. Nahikalimot kong uyab na nako si Crisanta kay nalamat ko’g maayo sa bathalan-ong katahom ni Gelia.
“I love you, Gel,” giingnan ko siya samtang gitabangan ko siya sa pagpahimutang sa daghang pinutos nga mga regalo sa ibabaw sa lamesa alang sa exchanging of gifts nga among pagahimuon atol sa among Christmas party. “May paglaom ba ko?”
“Mangalit ka man, Jose,” nagkanayon si Gelia. “Motira ka man og apiki.”
“Dugay na kong gustong mopadayag nimo sa akong gibati, Gel, pero karon lang ko nakabaton og kaisog sa pagpanguyab nimo.”
“Hatagi una ko’g higayon sa paghunahuna nianang imong gi-propose. Nakalitan man gud ko. Wa ko magdahom nga manguyab ka kanako.”
“Magpaabot ko, Gel, hangtod nga makahukom ka. Ug hinaot nga dili ko nimo pakyason.”
Milabay ang Pasko. Miabot ang bag-ong tuig. Natambalan na gyud ang akong kamingaw kang Gelia kay nagkita na man sab kami sa eskuylahan. Ug dihang nakahigayon ko, gisukna ko siya mahitngod sa gugma nga akong gihalad kaniya.
“Wa pa ko makahukom, Jose,” ni Gelia pa.
“Siyaro na man sab,” nako pa. “Sulod sa kapin duha ka semana wala pa gyud ka makadesisyon?”
“Hatagi pa ko’g laing usa ka semana,” niya pa.
Mipailob ko. Ug paglabay sa laing usa ka semana, misukna ko kaniya pag-usab. Ug labihan nakong lipaya kay wala man gayod pakyasa ni Gelia ang akong gugma. Apan wala madugay, nasayran ni Crisanta nga nagkatrato na kami si Gelia. -- Sumpayan pa