Sayo nga nagmata si Anna. Gisul-ob niya ang bag-ong jogging pants. Nagpalit gyod siya’g jogging pants kay sugod karong buntaga mag-jogging na siya. Duha ka tuig na siyang nabiyuda, pulos pag-atiman lang sa iyang sari-sari store ang iyang gihimo. Napasagdan niya ang iyang lawas nga mihana sa pagtambok.
Wa madugay nahiabot si Ronnie, nga biyudo sab. Managsama sila’g edad, kuwarenta’y singko. Usa ang anak ni Ronnie, nakahuman na sa kolehiyo ug nanarbaho sa Dubai. Samtang si Anna, way anak sa namatay niyang bana nga giatake sa kasingkasing.
"Ready ka na, An?"
"Molang. Sabot god nato ni."
Nagpahiyomay si Anna ug Ronnie. Di makalikay sa pagtan-aw og dugay si Anna sa nindot nga lawas ni Ronnie. Bisag may edad na kini apan macho gihapon kay kanunay nag-jogging matag buntag sayo sa ilang plasa sa lungsod sa Santa Cruz.
Si Ronnie ang nag-agni kaniya nga mag-jogging aron di siya motambok. Silingan sila.
"Tana. Maayong singuton dayon ta." Nagpangidhat si Ronnie kang Anna.
Nagpahikuhiko si Anna nga milakaw. Pag-abot nila sa plasa, nagsugod dayon sila pag-jogging. Dunay mga batan-on, babaye ug lalaki, nga nag-jogging sab. Mapahiyomon nga nagtan-aw kang Anna ug Ronnie.
"Sus, kapoy man diay ni, Ron." Mihunong pag-jogging si Anna. Naglakaw na lang siya."
"Mao gyud ni sa sinugdanan, An. Pero maanad ka ra sa kadugayan."
"Aw, sige god." Nag-jogging na sab si Anna. Nagtupad sila si Ronnie.
Pagka ugma sa buntag, wa mangabli si Anna sa iyang sari-sari store. Naglisod siya sa paglakaw. Nanakit ang iyang mga paa. Gipamaolan siya tungod sa iyang pag-jogging. Siya rang usa sa ilang balay. Wa siya magkuha og katabang kay madala niya ang mga buluhaton sa balay.
Dihay nanuktok. Bisag naglisod siya sa paglakaw, giablihan niya ang pultahan. Si Ronnie ang nahiabot.
"Unsay nahitabo, An? Serado man gihapon ang imong tindahan." Milingkod si Ronnie sa sopa human siya pasudla ni Anna.
"Ada, gipamaolan ko, uy!" Milingkod si Anna sa taas nga sopa.
"Mao ba. Akong pisilon ang imong mga paa aron mawa'a ang pamaol." Wa na maghuwat og tubag si Ronnie, giduol dayon niya si Anna.
Unang gipisil ni Ronnie ang mga bitiis ni Anna. Nakaagonto sa kasakit si Anna.
"Hinayhinay lang, uy! Nakapiyong si Anna. Kalit nga gigilkan siya labi na nga misaka ang mga palad ni Ronnie ngadto sa iyang tuhod.
"Agwantaha lang god. Mahuwasan ka lagi ron." Nagkurog na ang mga kamot ni Ronnie. Unya giwalis niya ang sayal ni Anna. Ang puti ug himsog nga mga paa ni Anna ang iyang gipisil niining higayona.
"R-Ron, unsa ba, uy. Kagilok ana, uy!" Nakahigda si Anna sa taas nga sopa. Napaak niya ang iyang mga ngabil. Ug wa niya tuyoa nga nakaagulo siya.
"Kumosta na ang gihalad kong gugma nimo, An?" Hangtod ang tingog ni Ronnie nagkurog na. Hapit di na niya maantos ang kainit nga gibati.
"Sus, mangutana pa gyod na siya, uy!"
Managsama na silang duha nga gigamhan sa di kapugngan nga pagbati. Gihagkan ni Ronnie ang mga paa ni Anna. Nagsalimuang si Anna nga nagpanghikap sa ulo ni Ronnie.
Unya ang ilang hinay nga tingog na lamang ang nadungog, uban sa pinugngan nilang mga hangos. (Kataposan)