Gula 104
Gilig-on ni Jody ang bonding sa mga empleyado. Iyang gipasabot kanila ang kamahinungdanon sa kooperasyon kay pinaagi niana makab-ot ang kalamboan. Gipatuman usab niya ang mga patakaran nga sama sa iyang gipatuman sa mga kompaniya nga iyang napanunod gikan sa namatay niyang bana.
Gikahimuot sa mga empleyado ang mga sumbanan nga iyang gipatuman. Gidugangan niya ang ilang mga prebilihiyo isip mga empleyado, butang nga wala mahimo ni Randy sa panahon nga si Randy pay nagdumala sa kompaniya.
Samtang busy sa pag-atiman sa mga papeles nga diha sa ibabaw sa iyang lamesa, mibagting ang intercom sa iyang atubangan. Iya kining gipunit. Si Miss Bugash ang nanawag, nagpahibalo kaniya nga may bisita siya.
Wala na lang siya mangutikuti kun kinsay iyang bisita. Giingnan na lang niya ang sekretarya nga pasudlon ang giingon niining bisita.
Apan nakugang si Jody pagkakita sa nahiabot nga bisita. Si Randy.
Daklit niyang gitutokan ang lalaki. Ingon sa midaot kini’g diyotay. Maila nga naglukdo kini’g dakong problema.
“Nasaag ka man tingali sa dalan nga imong gisubay Randy Maglana,” ni Jody pa. “Kay nahiabot ka man dinhi.” -- Sumpayan pa