Si Artem nagtrabaho sa usa ka sikat nga kompaniya. Siya ang supervisor sa ilang departamento. Daghan ang miingon nga guwapo si Artem apan ang uban sab miingon nga 'guwapa' siya. Kana gumikan lagi sa hiyas sa iyang pagka tawo nga matawag ta nga lalake apan 'mobikil' usahay. Husto baya unta siya sa barog. Morag si Piolo Pascual.
Usa ka higayon niana gi-assign siya sa ilang sub-company sa isla. Silang duha ug ang iyang suod nga kaubang babaye nga si Cherryl.
Pagdunggo sa pumpboat nga gisakyan nila ni Artem ug Cherryl, nahitalunong siya nga nagtan-aw sa boatman. Kaganina sa ilang pagsakay gikan sa mainland wala siya makamatikod niini. Apan karon sa ilang paghidunggo karon pa niya naklaro ang kabus-ok sa lawas sa boatman, kanang tigkarga ug tigdiskarga sa mga karga sa pumpboat ug tigpaandar sa makina niini.
Nagpanilap si Artem nga nagtutok sa kinatibuk-an sa boatman. Apan wala lang niya maklaro ang panagway niini kay giputos man kini sa panapton aron pangontra sa kainit sa Adlaw ug mao ray milusot ang ilang niini nga labihang taliwtiwa. Nag-long sleeve sab kini.
Morag nagpangurog si Artem sa iyang gibarogan. Miandar na sab ang iyang gana sa mga 'anak ni Adan' ilabi na nga iyang nakita nga nag-ugdo ang atubangan sa boatman tungod sa ka-fitting sa gisul-ob niining short pant nga stretchable.
"Hoy, Artem! Manganaog na ta's pumpboat, uy! Mipilit baya nang imong mata's atubangan sa boatman!" Gibuyag siya ni Cherryl.
"H-ha?" Mora'g nagdamgo'g udtong tutok si Artem.
Gikabiba ni Artem ang iyang bag nga binabaye gyod. Nanganaog sila si Artem ug Cherryl sa pumpboat. Ug gikidhatan pa ni Artem ang boatman ug gikawatan pa gyod niyag pasiplat ang nag-ugdong atubangan niini.
Sa dihang nakakanaog na sila si Artem ug Cherryl sa pumpboat gisugat sila sa ig-agaw ni Artem nga si Baby.
"Maayo kay nangabot na mo, Gaw Art," matud ni Baby nga nagngisi. "Ihatod ko dayon mo's balay kay inigkahuman mobalik ko dinhi, mosakay ko inigbalik ning pumpboat sa mainland kay duna koy adtoo'g City Hall," dugang ni Baby ug mipakapin: "Tagai ko's imong cell number, Gaw Art, aron makakontak ko nimo kun tua na ko'g mainland." "O, Gaw."
"Rodel," gisangpit ni Baby ang boatman. Rodel diay ngan. "Paglaksi diha'g karton sa sigarilyo ug isuwat ang cell number ni Agaw Artem unya itunol ngari nako."
"O, Nang," tubag sa boatman. Ug sa dihang nakakuha na'g karton nanghuwam sa bolpen ni Artem ug gipangutana si Artem sa cell number niini. Apan nahibulong si Artem kay giduha man paglista ni Rodel ang cell number. Ang usa iyang gihatag ni Baby ug ang usa iyang gipalugpitan sa iyang short.
Pagkagabii sa dihang matulog na unta si Artem naigpot siya kay misiyaok ang iyang selpon. May nagteks. Iyang gibasa: "Art c Rodel ni. Ugma y trabaho kay sbdo. D sad ko mouban s pumpbot lain ang mokuyog. Mgkta t s may causeway 10am. - Rodel."
Wa mahimutang si Artem. Nakigkita gyod siya ni Rodel pagkaugma. Didto nagsugod ang ilang panagsuod. Hangtod nga kun day-off ni Artem di niya pakuyogon sa pumpboat si Rodel ug iyang dad-on og panuroy.
Dihay kausa nga nanan-aw silag sine sa Cebu. 'Pakurog sa unod' ang salida nga ilang gitan-aw. Didto sila sa balcony. Di kaayo daghan ang tawo. Didto sila manglingkod sa kinadaplinan. Ug niadtong higayona 'gipugpog' ni Artem ang kang Rodel nga morag sa kabayong mola ang gidak-on. Satisfied kaayo si Artem ingon man si Rodel. Nagkasabot ang ilang masigka pagbati.
Unya miabot ang panahon nga namarayeg si Rodel og motorsiklo ni Artem. Iyang gikuhaan og data-data. Namasahero nalang si Rodel og habal-habal. Mibiya pagka boatman. Apan nakasuki si Rodel og estudyante sa fourth year high school. Iyang nauyab ug napamabdosan hangtod nanganak. Iyang gi-live-in!
Nalusno ang kalibotan ni Artem! Wa na niya tiwasa'g data-data ang motorsiklo hangtod naembargo. Mibalik si Rodel pagka boatman.
Usa ka adlaw may tuyo si Artem sa City Hall. Iyang nasakyan ang pumpabot nga gialagaran ni Rodel. Nagkasultianay sila...
"Art," mapaubsanon ang panuni ni Rodel. "Nagkinahanglan ko’g kuwarta kay nasakit ang akong anak. Nagkinahanglan ko's imong tabang." "Gisakitan kaayo ko's imong gibuhat, Del. Sorry kaayo." Gahi ang tingog ni Artem.
Ug sa ilang pagdunggo mikiros pagpanganaog ang mga pasahero. Nagpaulahi si Artem.
"Usbon ko, Art, hinaot nga mobalik pa ang imong pagbati ngari nako." Milugmaw ang mga luha ni Rodel. "Bisag kaluoy nalang." Unya mihagsa ang mga luha ni Rodel ug mitipon sa dagat.
Wa na gyod motingog si Artem. Nanaog siya ug nagpabiling nagbarog sa baybayon. Gipaandar ni Rodel ang pumpboat ug gipahugong balik sa isla.
Napahit ni Artem ang iyang wait. Unya iyang nakita nga ang aping sa dagat gihiwa sa pumpabot nga giluwanan ni Rodel -- ang boatman nga nahimong kabahin sa iyang kinabuhi. (Katapusan)