Gula 95
Tulin nga milambo ang tanang mga patigayon nga gibilin ni Mr. Salvador kang Jody gumikan sa makugihon niyang pagdumala.
Usa ka higayon niana, gibalitaan si Jody ni Jasmine bahin kang Megan.
“Nagkita mo?” Sukit ni Jasmine.
“Oo,” maoy tubag. “Didto sa SM. Nangita man gani siya nimo. Pero ako siyang giingnan nga wa na ta magkita sukad sa imong pag-resign sa Silver Star Daily.”
“Maayo hinuon nga mao kana ang imong gisulti kaniya.”
“Midaot ra ba ang imong manghod, Day.”
“Uy, wa diay makauyon sa iyang kaminyoon kang Randy?”
“Wa gyud tingali. Mora man gani to’g nagmahay sa iyang gidangatan.”
“Nganong nakasulti ka man niana, Day?”
“Daghan siya’g gitug-an nako, uy, kay dugaydugay man gyud ang among panagsulti. Niya pa, gikuhaan kuno siya ni Randy sa tanang katungod pagdumala sa mga negosyo ug ubang kabtangan nga gibilin sa namatay ninyong amahan. Si Randy na kunoy mibarog isip tag-iya sa tanang propiyedad sa inyong amahan karon.”
“Kasalbahis gud niya?”
“Mao lagi. Ug abi mo, giprangkahan kuno si Megan ni Randy.” -- Sumpayan pa