GULA 92
Apan nagpabiling tanghaga ngadto sa ilang mga kakompetensiya sa industriya ang matuod nga pagkatawo sa editor sa Cebu Standard. Maayong pagka-motivate ni Jody ang iyang mga empleyado hinungdan nga naghiusa usab sila paglilong sa iyang sekreto. Mao nga nagpabilin nga si Sarah Sinderella maoy nailhan sa katawhan nga maoy editor sa Cebu Standard.
Hangtod nga misantop sa hunahuna ni Jody ang usa ka nindot nga ideya. Nakigkita siya sa usa ka taas nga opisyal sa usa ka independent surveying institution. Gi-negotiate niya ang iyang plano ngadto sa maong opisyal. Sa sinugdan nagdumili sa pagsanong ang maong opisyal sa kabalaka nga makaguba kini sa ilang kredibilidad sa paghimog mga survey.
Apan gipasabot ni Jody ang maong opisyal sa balido niyang mga katarongan. Hangtod nga inanay nga nakombinser niya ang opisyal sa independent surveying institution. Unya nagkasabot sila sa presyo. Ug naplansa ang plano.
Nakugang na lang ang publiko sa dihang napublikar sa usa ka nasudnong pamantalaan ang resulta sa survey sa Philippine Social Pulse nga nagbutang nga ang Cebu Standard maoy nag-una sa tibuok kabisay-an sa padaghanay og sirkulasyon. Ang maong survey nakapaukay ilabi na sa kakompetensiya sa industriya sa Cebu Standard. -- Sumpayan pa