Gula 1
Dungan-dungan ra nga gikasal ang managkumpare nga sila si Abraham ug Valentin uban sa tagsa-tagsa nila ka asawa nga pareho usab nga taga barangay Paril sa Barili lima ka tuig na ang milabay.
Apan bisan og lima ka tuig na gikan sa ilang kaminyoon, pareho sila nga wala gayud makaangkon og liwat.
Usa ka Domingo niana, nagkakita ang managkumpare ug naglingaw-lingaw sila’g inom-inom samtang naghisgot sa ilang kahimtang nga wala gayud tugahi og anak.
“Paita pre, gihimo na namo ang tanan ni Brigida aron lang g’yud siya momabdos. Gituman na namo ang tambag sa among silingan nga bangilan og unlan ang sampot, iniro ug bisan unsa na lang apan wala gayud,” matud ni Valentin.
Dali kaayo nga nakatubag ang kumpare nga si Abraham. “Kami usab bitaw si Mare nimo Lydia pre, gihimo usab namo nang paagiha. Usahay magkilaw ko’g kinhason nga si-si kay maayo kuno, pero wala man g’yud.”
Nahurot na sa managkumpare ang usa ka botelya nga long neck nga gisugdan nila’g inom sa buntag pa. Midugang pa gihapon sila’g papalit og laing usa ka long neck.
Hubog-hubog na og gamay ang managkumpare dihang giapas sila sa ilang mga asawa didto sa tindahan ni Masyang aron paundangon na og inom. “Adto usa mo sa ilang Mare Brigida, Day Lydia kay mosunod ra kami si pare Valentin karong taud-taud,” matud ni Abraham nga nagkanguhal na hapit sa pagsulti tungod sa kahubog.
Nagkuyog ang managkumare nga sila si Lydia ug Brigida sa pagpanglakaw. Suod sila kay kaklase ang duha kaniadto. Pareho sila nga 25-anyos na ang pangedaron. Sa tanto nilang inom, may nasulod sa huna-huna ni Valentin ug mihunghong kini sa iyang kumpare.
“Pre, pre, ayaw lang kasuko ha. Duna ko’y sugyot nimo pamasin nga kini ang makatabang nga makabaton ta’g anak,” matud ni Valentin. “Unsa man kanang imong nahuna-hunaan pre.”
“Hain may maayo pre og karong gabhiona, magbaylo usa ta’g asawa pre. Ako’y modulog kang mare Lydia pre, unya kamo usab si mare nimo Brigida. Total pareho man na silang duha nga hitsuraan pre,” si Valentin pa nga seryoso kaayo sa iyang sugyot.
“Taym pa usa pre, mosugot kaha usab ang atong mga asawa pre?” ni Abraham pa nga nagduda nga mosupak g’yud ang ilang mga asawa sa sugyot nga magbayloay sila’g partner.
Didto sa balay nila ni Valentin, ang managkumare nagkukalingaw usab diay og inom-inom og lapad samtang naghuwat sa ilang mga bana. Dali ra nga daw mituyok ang ilang panan-aw.
Taud-taud, miabut na ang managkumpare nga sila si Valentin ug Abraham ug milingkod, apan didto na tupad sa ilang mga kumare. – Sumpayan pa