Gula 70
CEBU, Philippines - Wala madutli si Ricky sa mga kaso nga gipasaka sa mga politiko nga naig-an sa hait niyang mga komentaryo. Unang na-dismiss ang kaso nga gipasaka sa gobernador batok kaniya. Wala dangtig dugay, gisunod usab pag-dismiss ang libel case nga gipasaka sa kongresista batok kaniya. Mora’g naibtan og tunok si Ricky sa maong hitabo.
Nagpadayon ang gobyerno sa pagpangita’g paagi nga masulbad sa hingpit ang suliran sa insureksiyon sa nasod. Gipalapdan nila ang ilang counter-insurgency program. Gawas sa ilang livelihood ug balik-baril program, gilusad na usab nila ang land for the landless ug health program alang sa mga rebel returness.
Buot sa gobyerno nga makab-ot na sa hingpit ang kahusay ug kalinaw mao nga walay hunong ang ilang pagpaninguha nga makombinser ang mga sakop sa walhong pundok nga naglihok sa kabukiran pagbalik na sa sabakan sa kagamhanan. Samtang wala usab molunga ang AFP sa ilang tumong pag-neutralize sa mga rebelde sa kabukiran nga walay planong mosurender ngadto sa mga kamot sa balaod.
Epektibo ang mga pamaagi sa gobyerno. Sa lainlaing dapit sa nasod, daghan nang mga rebelde nga milugsong sa patag ug mitahan sa ilang kaugalingon ngadto sa kagamhanan. Ang uban kanila mga masakiton na. Kasagaran sa sakit nga mitakboy kanila mao ang impeksiyon sa kidney gumikan sa kanunay nga pagsud-an sa buwad ug ginamos. Ang uban gitakboyan sa sakit nga malaria. -- Sumpayan pa