Gula 85
“Wa pa man tingali kana kinahanglana sa pagkakaron, Enrique,” ni Jody pa. “Total anaa ka man nga makadumala niini.”
“Kagustohan ko nga ikaw nay mobarog isip tag-iya sa tanan kong mga negosyo. Total, wa man gyu’y laing may katungod sa pagpanunod niini gawas kanimo ug sa atong anak. Kay legal ko man ikaw nga asawa.”
Wala motingog si Jody. Wala siya makasabot sa iyang gibati niadtong higayona. Dihay kalipay nga nabatyagan niyang milugnot sa iyang kahiladman apan birahon lang usab dayon sa kasubo nga wala niya matugkad ang hinungdan.
“Nasayod ko nga may katakos ka sa pagdumala sa atong mga negosyo,” matud ni Mr. Salvador. “Bisan wala na unya ko, nakaseguro kong ipadayon mo ang pagpalambo niini.
“Ngano bang maghisgot man kita niana?” Nakaingon si Jody nga nakasabot sa sinultihan sa iyang bana.
“Tiguwang na ko, Honey. Dili matuis ang kamatuoran nga ang kamatayon maoy destinasyon sa tanang mga buhi. Gusto ko lang maseguro nga karon pa lang, anaa sa maayong mga kamot ang akong mga negosyo. Ug wala koy laing saligan niini gawas kanimo.” -- Sumpayan pa