Gula 67
“Nakabalos ka na, Ka Brenda,” matud ni Ronald dihang namalik na sila sa bukid nga ilang gikampohan.
“Oo, ka Ronald,” matud ni Ka Brenda. “Mao kadto’y angay kanila ug sa tanang mga mapahimuslanon ug abusado sa katilingban.
Nagpadayon si Ricky Liwanag sa naandan niyang mga buluhaton isip sakop sa media. Sa gihapon, wala siya’y kukahadlok nga mibutyag ug misaway sa mga kahiwian sa gobiyerno. Hait kaayo siya’g komentaryo batok sa pangurakot.
Nakakuha si Ricky og mga dokumento bahin sa anomalosong megadome project sa gobernador. Sa mga dokumentong nakuha ni Ricky, nabutyag nga wala i-award sa gobernador ang proyeko ngadto sa nakadaog nga bidder. Gi-award hinuon sa gobernador ang proyekto ngadto sa bidder nga wala makadaog sa bidding bisan mas mahal ang gimanghal niining kantidad sa proyekto kay sa bidder nga maoy nakadaog.
Nasayran nga suod sa gobernador ang contractor sa bidder nga wala makadaog sa bidding apan maoy gihatagan niini sa proyekto. Ang asawa sa maong contractor ig-agaw sa asawa sa gobernador. Kini ang usa sa gitumbok nga hinungdan nganong gi-award sa gobernador ngadto niini ang proyekto bisan og wala kini makadaog sa bidding ug dako pa gyud ang kantidad nga gimanghal niini alang sa proyekto. Natribukar kining tanan kay ang bidder nga nakadaog sa bidding apan wala makadawat sa award sa megadome project mihimo man og pakisusi kalabot niini. -- Sumpayan pa