Gula 81
“Hunahunaon ko pa kana, Sir,” ni Jody pa. Maglisod ko sa paghukom sa pagkakaron.”
Gitimbangtimbang ni Jody sa makadaghan ang gugmang gihalad ni Enrique Salvador kaniya. Tinuod nga dako ang gintang sa ilang pangedaron. Kawhaan ug unom pa lang ang edad ni Jody. Samtang si Mr. Salvador mora’g kaedad ra sa iyang amahan.
Apan kun dawaton niya ang gugma ni Mr. Salvador, mabulahan siya. Dako og katigayonan ang lagas. Mas dako pa tingali kay sa katigayonan sa iyang amahan.
Pero sa laing bahin, gihunahuna sab niya nga dili sab niya angay pahimuslan ang paghigugma ni Mr. Salvador kaniya. Dili kadula-dulaan ang gugma. Kun mosangpot kini sa kaminyoon, mas dako na unya ang responsibilidad.
Kini ang gihinuktokan pag-ayo ni Jody. Hangtod nga misantop sa iyang kahimatngon nga sa nanghitabo sa iyang kinabuhi, kinahanglang praktikal na siya. Dili na siya ang Jody kaniadto. Siya na ang Jody sa bag-ong panahon.
Mao nga sa sunod nga panagsulti nila ni Mr. Salvador, iya kining suginlan mahitungod sa iyang kaagi. Nga usa siya ka babaye nga nabiktima sa lalaking walay baroganan. Nga tungod sa iyang pagpakabuang sa maong lalaki, gihinginlan siya sa iyang amahan gikan sa ilang pinuy-anan. -- Sumpayan pa