Gula 66
Ingon sa nagmahay na hinuon karon si Jody kun nganong si Randy ang iyang gipalabi kay sa iyang amahan. Tungod sa paghigugma niya kang Randy, gitalikdan niya ang iyang amahan. Ug karon siya ang nahimong alaot, kay si Randy naglipay-lipay man uban kang Megan.
Naglakaw siya sa dalan nga walay tumong. Nagpadayon siya sa paghilak. Mora siya’g bata nga gibiyaan sa mga ginikanan taliwala sa masiot nga lasang.
Taudtaod nakalantaw siya’g kahayag sa sakyanan nga nagsingabot. Gipahiran niya’g dali-dali ang iyang mga luha. Nakahunahuna siya nga parahon ang nagsingabot nga sakyanan.
Dili siya tantong demalas kay usa ka taxi ang nagsingabot. Mihunong kini dihang iyang gipara. Giingnan niya ang driver nga magpahatod siya sa labing duol nga hotel.
Didto na si Jody magpalabay sa kagabhion sa hotel. Wala siya’y tarong nga kinatulgan. Gubot kaayo ang iyang hunahuna. Mora’g kalit ra kaayo ang mga panghitabo sa iyang kinabuhi alang kaniya. Daw usa kini ka makalilisang nga daman sa udtong tutok nga miabot sa iyang kinabuhi. -- Sumpayan pa