Gula 63
Pag-abot niya sa usa ka eskina, nakalantaw siya og sakyanan nga nagsingabot. Nasuta niya nga usa kini ka taxi. Iya kining gipara dihang nagsingabot na kini sa iyang nahimutangan.
Paghunong sa taksi, misakay dayon siya. Giingnan niya ang drayber nga magpahatod siya ngadto sa Whitehills Subdivision sa Banawa. Gipadagan gilayon sa sapyor ang taxi human madungog ang iyang gisulti.
Sanglit dili na man huot ang trapiko, kadali ra silang nakaabot sa dapit. Nakatultol na siya sa gipuy-an ni Randy kay gidala na siya dinhi sa ulitawo usa niana ka higayon. Gipahunong niya ang taxi sa tungod sa balay sa ulitawo. Nanaog siya human kabayri ang sapyor sa kantidad nga giyamar sa metrohan.
Dihang nakabiya na ang taxi nga naghatod kaniya,miduol siya sa gate sa balay ni Randy. Nakugang siya dihang iyang nadiskubrehan nga abiyerto ang gate. Nganong wala man manarangka si Randy? Kuyaw na ra ba karong panahona kay daghan nang mga tawong daotan nga mulihok panahon sa kagabhion.
Misulod siya sa gate. Apan misiga ang iyang mga mata. Nabantang sa iyang panan-aw ang sakyanan ni Megan diha sa lagwerta sa balay. Dili mahitabong masayop siya. Kang Megan gayod ang maong sakyanan. Kun mao, ania si Megan sa gipuy-an ni Randy. Nagsiga pa ang suga sa sala sa balay ni Randy. -- Sumpayan pa