Gula 1
Aron pagwagtang sa kakapoy tungod sa tibuok semana nga pagtrabaho, nagkasabot ang managhigala nga Efren ug Fred nga maglingaw-lingaw sila usa ka adlaw’ng Sabado human sa ilang trabaho.
“Bay Fred mangadto ta sa sikat kaayo nga Sanciangko’s Wildflower kay nindot kuno kaayo og sounds sa maong videokehan,” giingnan ni Efren ang higala.
“Ok bay, mag-abut ta didto mga alas siete sa gabii. Magpabilib ta nga maayo ta nga manganta,” abtik nga tubag ni Fred nga nagkatawa.
Pagkagabii. Mao g’yuy pagkanaug ni Fred sa iyang kotse dihang nabantang sa iyang panan-aw ang usa ka ID nga diha sa karsada.
Gipunit ni Fred ang ID ug natan-aw niya nga iya kini sa usa ka babaye. Misulod si Fred sa Sanciangko’s Wildflower apan gibitbit gihapon niya ang ID nga dunay matahum kaayo nga dagway sa usa ka babaye.
Sa lamesa ra gibutang ni Fred ang napunitan niya nga ID sa usa ka babaye. Gitawag niya ang usa ka waiter ug mi-order siya og beer.
Pagbalik sa waiter, mainampingon niini nga gibutang sa lamesa ang beer nga giorder ni Fred.
“Imo ba kining asawa ang anaa sa ID Sir? Gwapa diay kaayo ka og asawa no?” komedya nga dalang ulog-ulog sa waiter kang Fred.
Apan inay manghambog, wala mamakak si Fred. “No, ako ra kining napunitan ang ID diha sa karsada Bay.” “Mao ba Sir? Mora bitaw og nakaila ko niining anaa sa picture da,” matud sa waiter dayong punit sa ID ug giayo’g tan-aw.
“Sir, ang anak man diay kini sa tag-iya sa Sanciangko’s Wildflower. Si Ruth man diay ni Sir,” matud sa waiter. Miliraw ang mga mata sa waiter nga daw dunay gipangita. “Nia ra to dinhi sa Ruth Sir.”
Giingnan ni Fred ang waiter nga patug-anan si Ruth nga anaa kaniya ang iyang ID kay napunitan kini didto sa karsada.
Taud-taud, mitingog ang message alert sa cellphone ni Fred. Gikan ni Efren ang text. “Naa na ko paingon Bay.” Tubagon na unta ni Fred ang text gikan sa iyang amigo, apan giduol siya sa waiter nga kauban ang usa ka maanyag nga babaye.
“Mao kini si Ruth Sir, anak sa tag-iya sa bar,” matud sa waiter. Una nga mitunol sa iyang kamot si Ruth ngadto ni Fred. “Napunitan diay nimo ang akong nawala nga ID? Salamat g’yud ha, dili na unta ko makasulod sa tunghaan ugma.”
Wala dayon makatingog si Fred kay ang iyang mga mata mitutok pag-ayo sa maanyag nga panagway sa dalaga. Nakurat pag-ayo si Fred kay dunay mikalit lang paghapak sa iyang tuo nga abaga ug misingka. “Hoy ayaw na’g binuangi ang akong amiga ha!”
Paglingi ni Fred, nakita niya ang nagkatawa niya nga higala nga si Efren, kinsa classmate diay ni Ruth. (Sumpayan pa)