Walay kamatayon ang gugma

Gula 60

Taudtaod na si Jody nga naghulat og sakyanan apan wala gayo’y miagi. Lawom na man gud ang kagabhion. Niarong orasa, talagsa na lang kaayo ang mga sakyanan nga moagi sa ilang dapit. Residential area man gud kini. Ang kasagaran sa nanimuyo niining dapita may kaugalingong mga sakyanan.

Gilugwayan pa ni Jody ang mga gutlo sa iyang pagpaabot. Apan wala gayo’y sakyanan nga miagi, PUJ man o taxi. Nakahukom si Jody nga maglakaw na lang siya paingon sa highway. Mamasin siya nga makasakay didto. Magbuntagay man ang mga sakyanan sa busy nga kadalanan sa siyudad. Adto siya didto magpahatod og taxi paingon ngadto sa gipuy-an ni Randy. Wala siya’y laing nahunahunaan karon nga kadangpan gawas kang Randy.

Wala madugay sa paglakaw ni Jody, mibundak ang makusog nga ulan. Midali siya pagdagan ngadto sa waiting shed nga nahimutang sa usa ka eskina dili layo sa ilang pinuy-anan aron mamasilong. Nabasa gayod og diyotay ang iyang buhok ug sinina una siya nakapasilong.

Wala tuyoa, nakahilak si Jody nga nagpalandong sa kapait sa iyang kahimtang karon. Ania siya sa gawas sa balay niining mamingaw nang takna sa halawom nga kagabhion. Mora siya’g binuhat nga gisalikway sa kapalaran. -- Sumpayan pa

Show comments