Gula 57
Wala makatingog si Jody. Ingon sa natuk-an siya sa tanang gisulti sa iyang amahan. Lupig siya sa pangatarongan niini.
“Dili ko buot nga mahimo siyang kabahin sa atong pamilya, Jody,” nagkanayon si Mr. Garcia sa hugot niining pagdili kang Randy.
“Apan, Dad,” ni Jody pa. “Nagkahigugmaay na kami si Randy.”
“Putla ang maong gugma.”
“D-dili mahimo, Dad. Gimahal ko si Randy. Siya lang ang makahatag kanako og kalipay.”
“Pwes, mamili ka. Ako o si Randy?”
“D-dad...”
“Kun ako’y imong pilion, mabulahan ka. Apan kun si Randy ang imong pilion, wa kay masunod nga kabilin nga katigayonan gikan kanako. Ihurot ko ang tanan paghatag ngadto kang Megan.”
Naapiki ang paghukom ni Jody. Nahanduraw niya ang iyang kaugalingon nga nahisama sa bibingka nga gidangdang sa kainit sa kalayo sa ibabaw ug sa ilawom. Kinsay iyang pilion? Si Randy? O ang iyang amahan?
Gihigugma niya si Randy. Apan gimahal usab niya ang iyang amahan. Pareho silang bililhon alang kaniya. Nganong kinahanglan pa man gyud nga muabot ang panahon nga kinahanglan siyang mupili og usa sa duha ka linalang nga pulos mahinungdanon sa iyang kinabuhi. -- Sumpayan pa