Gula 16
“Diin ka man Ronald?” Misugod dayon pagpangutana ang dalaga dihang mibiya ang mga ginikanan niini sa sala ug nanulod sa kuwarto. “Nabalaka na kaayo ko. Unsa bay nahitabo nimo? Nganong karon ka lang mopakita nako?”
“Wa ba mo magkita si Manoy Ricky?” Misumbalik pagpangutana si Ronald.
“Nagkita mi. Gipangutana ko siya bahin nimo. Apan taphaw ang iyang tubag. Niya pa, maghuwat lang kuno ko nga mopakita ka kanako. Unsa man diay nahitabo, Ron?”
“Taas kaayong estorya, Teresa. Ang tinuod, miabin na ko sa walhong grupo.”
“U-unsa?”
“Mao kana, Teresa. Gani ning akong pag-anhi karon, may mga kauban ko. Ania lang sila sa atong palibot.”
“Unsa man kining imong gibuhat, Ronald? Unsaon na man lang ang atong gugma?”
“Di pa ko makatubag nianang maong pangutana. Niining higayona, hangyoon ko ang imong pagsabot. Miabin ko sa mga rebelde kay di na ko makaantos sa kahiwian sa mga lider sa kagamhanan ning atong nasod. Sobra na ang ilang pagpanglugpit sa mga kabos. Ngitngit ang atong kaugmaon. Ila kitang gihikawan pagsud-ong bisan sa anino na lang sa adlaw. -- Sumpayan pa