Gula 15
“Mananghid unta ko nimo, Kumander Abay,” ni Ronald pa human sa ilang panihapon.
“Asa ka man, Ka Ronald?” Sukit sa kumander.
“Makigkita ko sa akong hinigugma.”
Dili unta mosugot si Kumander Abay nga molakaw si Ronald aron pagpakigkita kang Teresa. Init pa sila sa mga sundalo tungod sa gihimo nilang sagunson nga pagpamanhig. Apan mihangyo gyud og maayo si Ronald. Kaha nakasabot sa iyang gibati, misugot na lang ang kumander. Apan gipakuyogan siya niini sa tulo niini ka sakop.
Alas siyete imedya sa kagabhion nanggikan sila si Ronald ug mga kauban paingon sa patag. Paspas ang ilang paglakaw apan mabinantayon. Wala sila mokompiyansa kay tingalig makasugat sila’g mga sundalo. Gidoble nila ang ilang pagmaigmat.
Dangtan og dul-an sa duha ka oras nga paglakaw, nahiabot na sila sa patag. Kay adlaw man nga Domingo, nakaseguro si Ronald nga anaa si Teresa sa gipuy-an niini. Tuod, wala siya masayop. Dihang nanuktok na siya sa pultahan, si Teresa ang miabli niini. Ug nakugang kini pagkakita kaniya. Sa makadiyot naggaksanay sila.
Human sa makadiyot nga paghangpanay, gipasulod ni Teresa si Ronald. Nakugang usab ang mga ginikanan sa dalaga sa kalit niyang pagtungha sa ilang pinuy-anan. -- Sumpayan pa