Gikan sa tingsira sa klase, mao usab kini ang panahon nga daghang mga batang lalaki nga magpatuli. Ug sama nako nga nagpangidaron og dose anyos, gi-agda ko sa mga katalirong kong mga ig-agaw nga magpatuli mi sa ilang Noy Wanito, ang banggi-itang manuliay sa among lungsod sa Bien Unido.
Ug aron dili mahabilin nila nga usa pa ka pisot, nisugot ako sa ilang agda kanako. Pero ang tinuod, ang kahadlok maoy nagpasulabi sa akong gibati. Haska gyud nakong talawana basta samad o dugo na ang hisgutan, daw sa makuyapan ko kun makadungog man lang gani og istorya, unsa na'g maoy hiwaon?
Pagka-buntag sayo, nahikuyog gyud ko's akong mga ig-agaw. Lima mi kabuok nga nagpanon paingon sa ilang Noy Wanito. Ug sa among pagpanglakaw, silang agaw Dexgar, Vers Qui, Ti-ak ug Jigger, daw sa mahinamon ug malipayon nga sa di madugay matuli na sila.
Samtang ako nga maoy nauwahi sa maong panon, way tingogtingog kay nagbutokbutok ang dughan sa kahadlok. Wa ko kasabot sa akong gibati atong higayona. Gusto una kong di modayon apan di ko gusto nga sugsugon unya hinuon ko nila nga talawan.
Ug bisan sa kahadlok nga gibati, nipadayon gyud ko hangtod nga nahiabot kami sa balay ni Noy Wanito.
Daplin sa baybayon nahimutang ang balay ni Noy Wanito. Didto sa punoan sa talisay nga nagbaharag, didto unang gipapungko si agaw Jigger ug gihiwa ang iyang pikoy.
Sa akong nakita, daw sa katumbahon nako sa kahadlok nga naglantaw. Labi na kay nagpiyongpiyong ang mga mata ni agaw Jigger sa paghiwa sa iyaha.
Garabing nakapangurog sa duha ko ka tuhod ug daw sa kabothunon na ang akong dughan sa kakuyaw. Gisunod si agaw Dexgar, dayon si Ti-ak ug Vers Qui, ug ako ang nagpa-uwahi.
Ug sa dihang ako na ang gipalingkod, nisamot ang pagpangurog sa duha ko ka tuhod. Singot pay imo, nga mora'g uwan nga nitabisay sa akong agtang. Ug sa paghiwa na ni Noy Wanito sa akong pikoy, garabi gyud nakong luspara hangtod nga ningitngit ang akong palibot ug nawala ko sa kalibotan. Nakuyapan gyud ko.
Ug sa akong pagkamatngon gipakpakan ko's mga hinampak kong mga ig-agaw nga nag-alirong sa akong gipungkoan. "Yeh...heeee ... natuli na's agaw Elmon" kantyaw sa mga hinampak kong mga ig-agaw. (Kataposan)